पत्नीसाठी झुकेरबर्गने बनवला चमकणारा डबा
   दिनांक :30-Apr-2019
नवी दिल्ली,
फेसबुकचा सीईओ मार्क झुकेरबर्गने आपल्या पत्नीसाठी नवीन संशोधन करून एक उपकरण तयार केले आहे. झुकरबर्गने नव्या संशोधनाची माहिती फेसबुक आणि इन्स्टाग्रामवर दिली आहे. झुकेरबर्ग यांच्या पोस्टनुसार, त्यांनी संशोधन करून एक चमकणारा लाकडी डबा तयार केला आहे. झुकेरबर्ग यांची पत्नी डॉ. प्रिसिला चान यांना रात्री मोबाइलमध्ये घड्याळ पाहण्याची सवय आहे. या सवयीमुळे अनेकदा त्यांची झोपमोड होते. पत्नीची झोपमोड होऊ नये, यासाठी झुकेरबर्गने चमकणारा डबा तयार केला आहे. या डबा सकाळी ६ ते ७ वाजेपर्यंत चमकत राहतो. त्यामुळे मुलांची तयारी करण्यासाठी सकाळी किती वाजता उठायचे, यासाठी प्रिसिला यांना आता मोबाइलमधील घड्याळ पाहण्याची गरज भासत नाही.

 
 
अशा प्रकारचा चमकणारा लाकडी डबा तयार करण्याची प्रेरणा पत्नी प्रिसिलाकडून मिळाल्याचे झुकेरबर्गने आपल्या पोस्टमध्ये म्हटले आहे. सकाळी उठून मुलांना तयार करण्याच्या चिंतेमुळे अनेकदा तिची झोपमोड होत असे. म्हणून नवीन चमकणाऱ्या डब्याची निर्मिती केली आहे. या डब्यातील दिवा सौम्य आहे. या दिव्यामुळे मुलांच्या तयारीसाठी उठण्याच्या वेळेचा तिला अंदाज येतो. या डब्यात वेळ दिसत नाही. त्यामुळे प्रिसिलाला काळजी करण्याचे कारण नाही. नवे संशोधन काम करत आहे. आता प्रिसिला शांतपणे झोपते, असेही झुकेरबर्गने आपल्या पोस्टमध्ये म्हटले आहे.