दुबईतही पबजीची दहशत
   दिनांक :08-Apr-2019
दुबई,
मोबाइल गेम पबजीवर बंदी घालण्याची मागणी भारतात होत असतानाच आता दुबईतील पालकांनीही या गेमवर बंदी घालण्याची मागणी केली आहे. या गेममधील हिंसेमुळे मुलांना वाईट वळण लागण्याची भिती असल्यामुळे या गेमवर बंदी घालावी अशी मागणी पालकांनी केली आहे.
 
 
दक्षिण कोरियातील एका गेमिंग कंपनीची निर्मिती असलेल्या पबजी या गेमने सध्या जगभर धूमाकूळ घातला आहे. अनेक मुलांना या मोबाइल गेमचे व्यसन लागले आहे. दुबईतील पालकही या गेममुळे त्रस्त झाले आहेत. मुलं या मोबाइल गेमच्या आहारी जात असल्यामुळे अधिक काळजी वाटत असल्याचे गुलनाझ आरिफ मौला यांनी सांगितले. या गेममुळे मुलांच्या मनावर वाईट परिणाम होत आहेत. मुलांमध्ये आक्रमकता वाढीस लागत असून अभ्यासाकडेही त्यांचे दुर्लक्ष होत असल्याचे त्यांनी सांगितले. पबजीसारख्या गेममुळे मुलांच्याच नाहीतर मोठ्यांच्या मनावर परिणाम होत असल्याचे पालकांनी सांगितले. पबजी गेमच्या आहारी गेल्यामुळे अनेकांना ड्रग्ज, धूम्रपान आणि मद्याचेही व्यसन लागले असल्याचे समोर आले आहे.
पबजीवर बंदी घालण्यासाठी काही पालकांनी संयुक्त अरब अमिरातीमधील टेलिकॉम प्राधिकरणाकडेही धाव घेतली आहे. प्राधिकरणानेही याची दखल घेतली आहे. तर, दुसरीकडे पबजीचे काही पालकांनी समर्थन केले आहे. यासाठी फेसबुकवर पबजी युएई कम्युनिटी पेज सुरू करण्यात आले आहे. मुलांना गेम आणि वास्तव यातील फरक कळतो. त्यामुळे अधिक काळजी करण्याची आवश्यकता नसल्याचे पालकांनी म्हटले. पबजीसारखे मोबाइल गेम मुलांना तणावातून मुक्त करत असल्याचा दावा या पालकांनी केला.
भारतात गुजरातमध्ये पबजीवर बंदी घालण्यात आली आहे. बंदी घालण्यात आल्यानंतरही गेम खेळताना आढळल्याबद्दल काही विद्यार्थ्यांना अटकही करण्यात आली होती. तर, फिलीपिन्समधील बिलिरान बेटाच्या महापौरांनी पबजी खेळणाऱ्या सरकारी कर्मचाऱ्यांना निलंबित करण्याचे आदेश काढले आहेत.