हिमवृष्टीमुळे तब्बल 300 याकचा मृत्यू
   दिनांक :13-May-2019
गंगटोक,
उत्तर सिक्कीममध्ये जोरदार हिमवृष्टीमुळे तब्बल 300 याकचा मृत्यू झाल्याची धक्कादायक घटना समोर आली आहे. उत्तर सिक्कीमचे जिल्हा दंडाधिकारी श्रीराज यादव यांनी दिलेल्या माहितीनुसार, 300 याकचा उपासमारीने मृत्यू झाला आहे. मुकुटंग व युमथांग भागात डिसेंबर 2018 पासून मोठ्या प्रमाणात हिमवृष्टी झाली असून आतापर्यंत मुकुटंग भागात याकचे 250 मृतदेह सापडले आहेत. तर 50 मृतदेह हे युमथांगमध्ये सापडले आहे.
 
 
गेल्या वर्षीच्या डिसेंबरपासून हिमवृष्टीमुळे प्राण्यांना काहीच खायला मिळत नाही त्याचाच हा परिणाम असावा असे श्रीराज यादव यांनी म्हटले आहे. पशूसंवर्धन विभागाने वैद्यकीय पथक मुकुटंग येथे पाठवले असून जे याक जिवंत आहेत त्यांच्यासाठी अन्न आणि चारा पाठवण्यात आला आहे. याकची वैद्यकीय तपासणी देखील केली जाणार आहे. मुकुटंगमधील 15 व युमथांगमधील 10 कुटुंबांच्या मालकीचे हे याक आहेत. या घटनेत फटका बसलेल्या कुटुंबांना आर्थिक मदत देण्यात येणार आहे.