कान्स महोत्सवात भारतीय निर्मात्याची बाजी

    दिनांक :19-May-2019
७२व्या कान्स चित्रपट महोत्सवात भारतीय चित्रपट निर्मात्यानं मोहोर उमटवली आहे. भारतीय चित्रपट निर्माते अच्युतानंद द्विवेदी यांच्या सीड मदर लघुपटाला नेप्रेसो टँलेंटस २०१९ या विभागात तिसऱ्या क्रमांकाचा पुरस्कार पटकावला आहे. अच्युतानंद द्विवेदी मुळचे मुंबईचे. मुंबईतील जगण्याचा वेग आपला बळी घेईल याची जाणीव झाल्यानं त्यांनी मुंबई सोडली आणि आता ते पुद्दुचेरी येथे राहतात.
 
 
कान्स महोत्सवात नेसप्रेसो टँलेंट या विभागात या वेळी वुई आर व्हॉट वुई इट म्हणजेच अन्नाच्या माध्यमातील अनुभवांची देवाणघेवाण हा विषय देण्यात आला होता. यात शेती व जैवविविधता,अन्न वारसा व मूल्य साखळी, लोकप्रिय संस्कृतीतील अन्न असे तीन विषय होते.
विविध विषयांवर प्रायोगिक माहितीपटांची निर्मिती करणाऱ्या द्विवेदींनी यापूर्वी अनेक व्यावसायिक जाहिरातीही केल्या आहेत. माहितीपटासाठी परसबागेतील झाडांकरिता चांगल्या बियाणांचा शोध घेत असताना महाराष्ट्रातील नगर जिल्ह्यातील बीज माता म्हणून ओळखल्या जाणाऱ्या राहिबाई पोपेरे यांचे काम त्यांच्यापुढे आले. त्यानंतर राहिबाई यांनी शेतीत घडवून आणलेले बदल, तयार केलेली बीजपेढी याचे चित्रण द्विवेदी यांनी 'सीड मदर' लघुपटातून केले.
 
सीड मदरचे चित्रीकरण मिरर लेन्सने केलं आहे.
नेसप्रेसो २०१९ विभागात पहिला पुरस्कार आंतरराष्ट्रीय गटात न्यूझीलंडच्या जोश मॉरिस यांना बालीमधील तांदूळ लागवडीवर आधारीत सुबक या लघुपटासाठी मिळाला. तर, दुसरा पुरस्कार हा मेक्सिकन निर्माते मार्को ऑरेलिओ सेलीस यांना रूफो या लघुपटासाठी मिळाला आहे.