आयसीसी कसोटी क्रमवारीत भारत अव्वल स्थानी कायम

    दिनांक :02-May-2019
दुबई,
आंतरराष्ट्रीय क्रिकेट परिषदेने (आयसीसी) जाहीर केलेल्या जागतिक क्रमवारीत कसोटीमध्ये भारतीय संघाने आपले अव्वल स्थान कायम राखले आहे. यासोबतच एकदिवसीय क्रमवारीत पहिल्या स्थानी असलेल्या इंग्लंडपासून भारत अवघ्या दोन गुणांनी मागे असल्यामुळे आगामी विश्वचषकात टीम इंडियाला अव्वल स्थान परत मिळवण्याची सुवर्णसंधी आहे. 

 
आयसीसीने ताजी क्रमवारी बनवताना २०१५-१६ या वर्षातील मालिकांचे निकाल वगळले आहेत तर २०१६-१७ आणि २०१७-१८ या दोन वर्षांत लागलेल्या निकालांचे ५० टक्के गुणच गृहित धरण्यात आले आहेत.
कसोटी क्रमवारीत भारत पहिल्या तर न्यूझीलंड दुसऱ्या स्थानी असून ताज्या क्रमवारीनंतर या दोन्ही संघांत केवळ तीन गुणांचे अंतर उरले आहे. नवी क्रमवारी तयार करण्याआधी भारताच्या खात्यात ११६ तर न्यूझीलंडच्या खात्यात १०८ गुण होते. मात्र, २०१५-१६ मधील दक्षिण आफ्रिका आणि श्रीलंकेविरुद्धच्या मालिका वगळण्यात आल्याने भारताला ३ गुण गमवावे लागले (दोन्ही मालिका भारताने जिंकल्या होत्या) तर ऑस्ट्रेलियाविरुद्धची मालिका वगळण्यात आल्याने न्यूझीलंडला (मालिकेत न्यूझीलंडचा २-० ने पराभव झाला होता) तीन गुणांचा फायदा झाला आहे.
गुणतालिकेत केवळ एकमेव बदल झाला असून इंग्लंडने ऑस्ट्रेलियाला मागे टाकत चौथे स्थान पटकावले आहे. दक्षिण आफ्रिकेने तिसरे स्थान कायम राखले आहे. ऑस्ट्रेलिया पाचव्या, श्रीलंका सहाव्या, पाकिस्तान सातव्या, वेस्ट इंडिज आठव्या, बांगलादेश नवव्या तर झिम्बाब्वे दहाव्या स्थानी आहे.