शांततेसाठी भारताशी चर्चेस तयार: पाकिस्तान

    दिनांक :26-May-2019
तभा ऑनलाईन टीम  
नवी दिल्ली,
भारतात स्थापित होत असलेल्या नरेंद्र मोदी यांच्या नेतृत्वाखालील नव्या सरकारसोबत प्रलंबित मुद्द्यांवर चर्चा करण्याची तयारी पाकिस्तानने दाखवली आहे. पाकिस्तानचे परराष्ट्र मंत्री महमूद कुरेशी यांनी ही भूमिका मांडली आहे.
शनिवारी मुल्तान येथे आयोजित एका इफ्तार पार्टीत संबोधित करताना कुरेशी यांनी ही भूमिका मांडली. भारत आणि पाकिस्तान या दोन्ही देशांमध्ये शांतता आणि समृद्धीसाठी काही मुद्दे निकालात काढण्याची आवश्यकता असल्याचे ते म्हणाले.
पाकिस्तानचे पंतप्रधान इम्रान खान यांनी नरेंद्र मोदी यांनी लोकसभा निवडणुकीत मिळवलेल्या अभूतपूर्व विजयानंतर त्यांचे अभिनंदन केले आणि दोन्ही देशांदरम्यान शांतता आणि समृद्धीसाठी एकत्र काम करण्याची इच्छा बोलून दाखवली.
भारतातील लोकसभा निवडणुकीत मोदींचा विजय झाल्यास दोन्ही देशांदरम्यान शांततेसाठी तसेच काश्मीर मुद्द्यावर चर्चेसाठी चांगली संधी निर्माण होऊ शकते, असे एप्रिलमध्ये पंतप्रधान इम्रान खान यांनी म्हटले होते. भारतातील लोकसभा निवडणुकीचे निकाल पाकिस्तानच्या दृष्टीने महत्त्वाचे आहेत. याचे कारण म्हणजे पुलवामा दहशतवादी हल्ल्यानंतर दोन्ही देशांचे संबंध कमालीचे ताणले होते. नवे सरकार भारत-पाक संबंधांची दिशा ठरवणार आहे. याच कारणामुळे पाकिस्तानने नव्या सरकारपुढे चर्चेला प्रस्ताव ठेवण्याची तयारी सुरू केली आहे.