चिरंजीवीच्या सिनेमाच्या सेटला आग, कोट्यवधींचे नुकसान
   दिनांक :03-May-2019
सुपरस्टार चिरंजीवीचा १५१ वा सिनेमा असलेल्या 'सई रा नरसिम्हा रेड्डी' च्या सेटला आज पहाटे आग लागली. या ऐतिहासिक सिनेमाचं शूटिंग गेल्या वर्षभराहून अधिक काळ सुरू आहे. हैदराबाद येथील कोकापेट येथे या सिनेमाचा भव्य दिव्य सेट उभारला होता. या ठिकाणी चिरंजीवीचं फार्महाऊस देखील आहे. सिनेमाच्या सेटवरील २ कोटींची मालमत्ता या आगीत जळून खाक झाली आहे. या आगीत कोणतीही जीवितहानी झालेली नाही.
 
 
या सिनेमाचं बजेट ३०० कोटींचं आहे. येथे एका राजाच्या राज्याचा सेट उभारण्यात आला होता. ही जागा चिरंजीवीच्याच मालकीची आहे. ही आग शॉर्टसर्कीटमुळे लागल्याची शक्यता वर्तवण्यात येत आहे. या सिनेमात अभिनेते अमिताभ बच्चन यांचीही विशेष भूमिका आहे. आगीच्या घटनेमुळे अमिताभ बच्चन यांनी त्यांचं शूटिंग लांबणीवर टाकलं आहे. 'सई रा...' सिनेमाची कथा रायलसीमेत ब्रिटिशांविरोधात लढलेल्या एका बंडखोर नेत्याची कथा आहे. अमित त्रिवेदींनी या सिनेमाला संगीत दिलं आहे.