काँग्रेस लोकसभा विरोधी पक्ष नेते पदासाठी दावा करणार नाही – सुरजेवाला

    दिनांक :01-Jun-2019
एकीकडे देशात नव्या सरकारने कामकाजाची सुत्र हाती घेतली आहेत. मात्र, दुसरीकडे काँग्रेस लोकसभा विरोधी पक्ष नेते पदासाठी दावा करणार नाही, असे काँग्रेस प्रवक्ते रणदीपसिंह सुरजेवाला यांनी सांगितले आहे. यासंदर्भात सुरजेवाला म्हणाले की, लोकसभेत विरोधी पक्ष नेते पदासाठी १० टक्के म्हणजेच ५४ सदस्यांची आवश्यकता असते. आमच्याकडे पुरेसे संख्याबळ नाही म्हणुनच आमचे संख्याबळ ५४ होईपर्यंत आम्ही विरोधी पक्ष नेते पदासाठी दावा करणार नाही. आम्ही ही जबाबदारी सरकारवरच सोडली आहे. त्यामुळे आता त्यांनीच ठरवायचे आहे की एखाद्या पक्षाला विरोधी पक्ष नेते पद द्यायचे की नाही.

 
देशभरातील लोकसभेच्या ५४३ जागांपैकी या निवडणुकीत काँग्रेसला केवळ ५२ जागांवरच विजय मिळाला आहे. लोकसभेच्या विरोधी पक्ष नेते पदासाठी ५४ जागांची आवश्यकता असते, त्यामुळे काँग्रेसला दोन जागा कमी पडत आहेत. भाजपाने पंतप्रधान नरेंद्र मोदींच्या नेतृत्वात या लोकसभा निवडणुकीत घवघवीत यश मिळवत, तब्बल ३०३ जागांवर विजय मिळवला आहे.
 
 
 
काँग्रेसच्या नवनिर्वाचित लोकसभा सदस्यांची शुक्रवारी पहिली बैठक झाली. या बैठकीत सोनिया गांधा यांची चौथ्यांदा काँग्रेसच्या संसदीय नेतेपदी निवड करण्यात आली. सोनिया गांधी २०१४ पासून या पदावर आहेत.