पुनाळेकर, भावेच्या सीबीआय कोठडीत वाढ

    दिनांक :01-Jun-2019
ज्येष्ठ समाजसेवक नरेंद्र दाभोलकर यांच्या हत्येप्रकरणी अटक करण्यात आलेले 'सनातन संस्थे'चे वकील संजीव पुनाळेकर आणि त्यांचे सहकारी विक्रम भावे यांच्या सीबीआय कोठडीत येत्या ४ जूनपर्यंत वाढ करण्यात आली आहे. पुण्यातील शिवाजी नगर न्यायालयाने या दोघांनाही सीबीआय कोठडी सुनावली आहे.

 
संजीव पुनाळेकर आणि विक्रम भावे यांना या आधी शिवाजीनगर न्यायालयाने १ जून पर्यंत सीबीआय कोठडी सुनावली होती. आज या दोघांच्याही कोठडीची मुदत संपल्याने त्यांना न्यायालयात हजर करण्यात आले असता न्यायालयाने त्यांना ४ जूनपर्यंत सीबीआय कोठडी सुनावली आहे.
असे सापडले धागेदोरे
नरेंद्र दाभोलकर यांची २० ऑगस्ट २०१३ रोजी पुण्यात ते मॉर्निंग वॉक करत असताना जवळून गोळ्या झाडून हत्या करण्यात आली होती. याप्रकरणी सीबीआयने सचिन अंदुरे आणि हिंदू जनजागृती समितीचा सदस्य वीरेंद्र तावडे या दोघांना आधीच अटक केली आहे. त्यांच्या चौकशीत जी माहिती समोर आली त्याआधारे पुनाळेकर आणि भावे या दोघांना अटक करण्यात आली आहे. नालासोपारा स्फोटकप्रकरणी अटकेत असेल्या शरद कळसकरच्या तपासातून सचिन अंदुरेचे नाव पुढे आले होते.
हे आहेत पुनाळेकर आणि भावे
पुनाळेकर हिंदू विधिज्ञ परिषदेचे सचिव व 'सनातन'च्या कार्यकर्त्यांचे वकील म्हणून काम करतात. तर, भावे हिंदू विधिज्ञ परिषदेत माहिती अधिकार कार्यकर्ता म्हणून काम करतो. ठाण्यातील गडकरी रंगायतन आणि पनवेलमधील थिएटरमध्ये ४ जून २००८ रोजी झालेल्या बॉम्बस्फोटाप्रकरणी विक्रमला दोषी ठरवण्यात आले होते. त्याला १० वर्षांची शिक्षा झाली होती. तो जामिनावर होता.