प्रफुल्ल पटेल यांना ईडीचं समन्स, ६ जूनला होणार चौकशी

    दिनांक :01-Jun-2019
हवाई वाहतूक उद्योगातील करारातील आर्थिक गैरव्यवहाराप्रकरणी (एव्हिएशन घोटाळ्याप्रकरणी) राष्ट्रवादीचे नेते आणि माजी नागरी उड्डाण मंत्री प्रफुल्ल पटेल यांना ईडीने समन्स बजावलं असून त्यांना येत्या ६ जून रोजी सकाळी साडे अकरा वाजता चौकशीसाठी हजर राहण्याचे आदेश दिले आहेत. ईडीनं समन्स बजावल्याची माहिती मिळताच पटेल यांनी राष्ट्रवादीची बैठक अर्धवट सोडली.
 
उद्योग सल्लागार दीपक तलवारविरोधात प्राप्तिकर कार्यालयाने पाच गंभीर गुन्हे दाखल केले आहेत. स्वत:च्या तसेच कुटुंबीयांच्या बँक खात्यांत शेकडो कोटी रुपयांची रक्कम अवैधपणे जमा केल्याचा त्याच्यावर आरोप आहे. या प्रकरणी यूपीए सरकारच्या उच्चपदस्थ अधिकाऱ्यांच्या इशाऱ्यावरून विशिष्ट विमान कंपन्यांना झुकते माप देण्यात आले असे तपासात दिसत असल्याचे प्राप्तिकर अधिकाऱ्यांनी म्हटले होते. आर्थिकदृष्ट्या फायदेशीर असणारे काही हवाई मार्ग तलवारने तीन आंतरराष्ट्रीय विमान कंपन्यांना मिळवून दिले होते. या मोबदल्यात तलवारला २००८- ०९ या कालावधीत २७२ कोटी रुपये मिळाले, असा दावा ईडीने न्यायालयात केला होता. दीपक तलवार हा प्रफुल्ल पटेल यांचा चांगला मित्र होता, असे देखील न्यायालयाने म्हटले होते. त्यामुळे पटेल यांचीही या घोटाळ्याप्रकरणी चौकशी करण्यात येणार असल्याचं सूत्रांनी सांगितलं.
असे आहे प्रकरण
या घोटाळ्याची ईडीने ऑगस्ट २०१७मध्ये चौकशी सुरू केली होती. याप्रकरणी सीबीआयने नागरी उड्डान मंत्रालयाचे अधिकारी, एनसीआयएल, एअर इंडिया आणि अज्ञात व्यक्तिंविरोधात एफआयआर दाखल करण्यात आला होता. याप्रकरणी चौकशीपासून वाचण्यासाठी दीपक तलवार देश सोडून पळाला होता. त्यानंतर त्यांचं दुबईतून प्रत्यार्पण करण्यात आला होते. त्यानंतर ईडीने त्याला अटकही केली होती. आर्थिक स्थिती नसताना ७०,००० कोटी रुपये किंमतीच्या १११ विमानांची खरेदी, एअर इंडिया आणि इंडियन एअरलाइन्सचे विलीनीकरण, परकीय गुंतवणूकीतून प्रशिक्षण संस्था सुरु करणे तसेच आर्थिकदृष्ट्या फायदेशीर असणारे काही हवाई मार्ग खासगी कंपन्यांना देणे अशा चार प्रकरणांचा ईडीकडून तपास सुरु आहे. या चारही प्रकरणांमध्ये गैरव्यवहार हे सर्व प्रकरण यूपीए- १ च्या काळातील असून त्याकाळी राष्ट्रवादीचे नेते प्रफुल्ल पटेल यांच्याकडे विमान वाहतूकमंत्रीपदाचा कार्यभार होता. त्यामुळेच पटेल यांची चौकशी करण्यात येत असल्याचं सूत्रांनी सांगितलं.