जीव देऊन गाइडने ७ पर्यटकांना वाचवले

    दिनांक :01-Jun-2019
श्रीनगर
दक्षिण काश्मीरच्या अनंतनाग जिल्ह्यात पहलगाम येथील मवुरा भागात लिडेर नदीत पर्यटकांची बोट बुडाली. या घटनेत गाइड रौफ अहमद डार याने जीवाची बाजी लावत नदीत बुडणाऱ्या ७ पर्यटकांचे प्राण वाचवले. मात्र त्यांना वाचवताना रौफचा मृत्यू झाला. शुक्रवारी ही घटना घडली.



 
बोटीत एकूण सात पर्यटक होते. त्यापैकी दोन विदेशी पर्यटक होते. अचानक आलेल्या वादळी वाऱ्यामुळे पर्यटकांची बोट नदीत उलटली. गाइड रौफ अहमद डारही नदीत पडला. यावेळी रौफने आपला जीव धोक्यात घालून नदीत बुडणाऱ्या सर्व पर्यटकांचे प्राण वाचवले. पण त्यांना वाचवताना तो बेपत्ता झाला. यानंतर त्याच्या शोधासाठी एसडीआरएफ आणि पोलिसांनी मोहीम राबवली. अखेर शनिवारी सकाळी त्याचा मृतदेह लिडेर नदीवरील भवानी पुलाजवळ आढळून आला. शवविच्छेदनानंतर त्याचा मृतदेह कुटुंबीयांकडे सोपवण्यात आला.
आपला जीव देऊन सात पर्यटकांचे प्राण वाचवणाऱ्या रौफ अहमद डारच्या शौर्याची दखल प्रशासनाने घेतली आहे. अनंतनागच्या उपायुक्तांनी शौर्य पुरस्कारासाठी रौफच्या नावाची शिफारस केली आहे. दरम्यान, आपला जीव देऊन पर्यटकांचे प्राण वाचवणाऱ्या रौफला सॅल्युट करतो, असं ट्विट नॅशनल कॉन्फरन्सचे नेते ओमर अब्दुल्ला यांनी केलंय.