निवृत्तीबाबत तेंडुलकरने दिला युवीला 'हा' सल्ला!

    दिनांक :10-Jun-2019
मुंबई,
युवराज सिंगने निवृत्तीचा निर्णय घेण्यापूर्वी वीरेंद्र सेहवाग, झहीर खान, आशीष नेहरा यांच्यासह अनेक सहकाऱ्यांशी चर्चा केली. यांच्यासह एक नाव असे होते की ते नसते तर सर्वांना आश्चर्य वाटले असते. ते नाव म्हणजे महान फलंदाज सचिन तेंडुलकर लहानपणापासून ज्याला आदर्श मानले त्याच्यासोबत खेळण्याची संधी मला मिळाली. त्याच्यासोबत वर्ल्ड कप उंचावण्याचा मान युवीला मिळाला. त्यामुळे वर्ल्ड कपमधून निवृत्ती होण्यापूर्वी युवीने आवर्जुन तेंडुलकरचा सल्ला घेतला. निवृत्तीचा निर्णय तुझ्यावर आहे, लोकांकडे लक्ष नको देऊस, हा सल्ला तेंडुलकरने त्याला दिला.

 
भारतीय संघाचा तडाखेबाज फलंदाज युवराज सिंगने सोमवारी आंतरराष्ट्रीय आणि प्रथम श्रेणी क्रिकेटमधून निवृत्ती घेतली. मागील दोन वर्ष मर्यादित षटकांच्या आंतरराष्ट्रीय क्रिकेटपासून दूर असलेल्या युवीला हा निर्णय जाहीर करताना भावनांवर नियंत्रण राखणे जड जात होतं. पत्रकारांशी संवाद साधताना त्याचा आवाज जड झाल्याचे ऐकू येत होते. पण, त्यानं मनावर दगड ठेवून हा निर्णय जाहीर केला. युवराजचा निवृत्तीचा निर्णय तडकाफडकी नक्की नव्हता. निवृत्ती घेण्याचा निर्णय हा वर्षभरापूर्वीच घेण्याचा विचार केला होता, असे युवीनं सांगितले.
 
 
युवराजच्या नावावर 2007चा ट्वेंटी-20 वर्ल्ड कप, 2011चा वन डे वर्ल्ड कप आणि 19 वर्षांखालील वर्ल्ड कप आहेत आणि हे तीनही वर्ल्ड कप जिंकणारा तो एक खेळाडू आहे. गेली दोन वर्ष युवराज भारताकडून एकही वन डे किंवा ट्वेंटी -20 सामना खेळलेला नाही.
 
 
भविष्यातही त्याला राष्ट्रीय संघात स्थान मिळेल याची शक्यताही कमी आहे. त्यामुळे त्याने निवृत्ती स्वीकारण्याचे ठरवले आहे. युवीनं 40 कसोटी सामन्यांत 33.92 च्या सरासरीनं 1900 धावा केल्या आणि 9 विकेट्सही घेतल्या. वन डे क्रिकेटमध्ये त्याच्या नावावर 304 सामने आहेत आणि त्यात त्याने 36.55च्या सरासरीनं 8701 धावा केल्या. वन डे क्रिकेटमध्ये त्याच्या नावावर 111 विकेट्सही आहेत. ट्वेंटी-20 क्रिकेटमध्ये त्यानं 58 सामन्यांत 1177 धावा व 28 विकेट्स घेतल्या आहेत.