सॅम माणेकशॉनच्या भूमिकेत विकी

    दिनांक :27-Jun-2019
मुंबई:
१९७१ मध्ये बांगलादेश मुक्तीसाठी झालेल्या संग्रामात पाकिस्तानला गुडघे टेकायला लावणारे भारतीय सैन्याचे पहिले फिल्ड मार्शल सॅम माणेकशॉ यांच्या आयुष्यावर दिग्दर्शिका मेघना गुलजार चित्रपट बनवणार आहे. या चित्रपटात अभिनेता विकी कौशल सॅम माणेकशॉ यांच्या भूमिकेत दिसणार आहे.
 
 
'मुंबई मिरर' ला दिलेल्या एक्सक्लुझिव्ह मुलाखतीत मेघना गुलजार यांनी सांगितलं की, 'विकीला या भूमिकेबद्दल विचारण्याआधी मला कथेचा ड्राफ्ट पूर्ण करायचा होता. एके दिवशी सहज मी विकीला फोन केला आणि आम्ही कॉफी प्यायला भेटायचं ठरवलं. त्यावेळी सॅम माणेकशॉंविषयी आमचं बोलणं झालं. त्याच दिवशी तो चित्रीकरणासाठी अमेरिकेला जायला निघणार होता त्यामुळे त्याला स्क्रिप्ट वाचायला वेळ मिळणार नव्हता. पण त्यानं स्क्रिप्ट न वाचताच भूमिका साकारायला होकार कळवला. मी त्याला स्क्रिप्ट वाचून, पुन्हा एकदा याबद्दल विचार करून फोन करण्यास सांगितले. त्याने ती स्क्रिप्ट वाचली आणि त्याला कथा आवडल्याचे मला कळवले. '
 
 
दरम्यान, आज माणेकशॉ यांची पुण्यतिथी असून त्यानिमित्तानं विकीनं नुकताच या चित्रपटातील त्याचा फर्स्ट लुक सोशल मीडियावर शेअर केला आहे. 'भारताचे पहिले फिल्ड मार्शल, सॅम माणिकशॉ यांची भूमिका साकारायची संधी मला मिळाली आहे. एक सच्चा देशभक्त पडद्यावर साकारायला मला मिळणार आहे. या निर्भय देशभक्ताचा प्रवास मोठ्या पडद्यावर उलगडण्यासाठी मी प्रचंड उत्सुक आहे. मी त्यांची भूमिका साकारतोय याचा मला अभिमान आहे.' या चित्रपटाचं दिग्दर्शन मेघना गुलजार करणार असून २०२१ मध्ये चित्रपटाच्या चित्रीकरणाला सुरुवात होणार आहे.