'द लायन किंग'चा ट्रेलर आला

    दिनांक :28-Jun-2019
मुंबई,
अभिनेता शाहरुख खान आणि त्याचा मुलगा आर्यन यांचा आवाज वापरण्यात आल्यामुळं गेल्या अनेक दिवसांपासून चर्चेत असलेल्या ‘द लायन किंग’ या इंग्रजी सिनेमाच्या हिंदी रिमेकचा ट्रेलर नुकताच प्रदर्शित झाला आहे. शाहरुखच्या चाहत्यांनी हा ट्रेलर अक्षरशः उचलून धरला असून सोशल मीडिया वेगवेगळ्या प्लॅटफॉर्म्सवरून तो शेअर केला जात आहे.
 
 
‘द लायन किंग’मध्ये जंगलचा राजा 'मुफासा'साठी शाहरुखचा तर, 'सिम्बा'च्या पात्राला आर्यनचा आवाज मिळणार असल्याचं काही दिवसांपूर्वी समोर आलं होतं. चित्रपटाच्या ट्रेलरमध्ये शाहरुख खान 'मुफासा'साठी डबिंग करतानाही दिसतोय.
शाहरुखच्या चाहत्यांची या ट्रेलरला जोरदार पसंती मिळत आहे. सोशल मीडियावर हा ट्रेलर व्हायरल झाला आहे. स्वत: शाहरुख खान या सिनेमाच्या प्रदर्शनासाठी उत्सुक आहे. 'द लायन किंग' माझ्या संपूर्ण कुटुंबाला फक्त आवडतच नाही, तर या चित्रपटाला आमच्या मनात एक वेगळं स्थान आहे. एक बाप म्हणून मला 'मुफासा' जवळचा वाटतो. त्याचं आणि त्याच्या मुलाचं नातं मी समजू शकतो. या चित्रपटाला मिळालेला वारसा कालातित आहे आणि अशा सुंदर चित्रपटाचा मी व माझा मुलगा आर्यन भाग होऊ शकलो, याचा अभिमान आहे. अबराम सुद्धा चित्रपटाची आतुरतेनं वाट पाहतोय,' अशी प्रतिक्रिया शाहरुखनं दिली आहे.