मान्सून २४ तासात केरळमध्ये होणार दाखल

    दिनांक :07-Jun-2019
नवी दिल्ली,
नैऋत्य मोसमी पाऊस येत्या २४ तासात केरळमध्ये दाखल होण्याची शक्यता हवामान विभागाने वर्तवली आहे. यापूर्वी पाच दिवस विलंबाने म्हणजे ६ जूनपर्यंत मान्सूनचं आगमन होणार असं सांगण्यात आलं होतं. पण आता आणखी दोन दिवस मान्सूनची प्रतीक्षा वाढली आहे.
 
 
भारतात केरळच्या किनारपट्टीला धडकून मान्सून दाखल होतो. त्यानंतर तो देशभर आगेकूच करतो. केरळमध्ये मान्सून आल्यानंतर पुढील सरासरी सात दिवसात तो महाराष्ट्रात दाखल होतो. दरवर्षी सामान्यपणे १ जूनला मान्सून केरळात दाखल होण्याची शक्यता असते.
 
 
 
यंदा मान्सूनच्या आगमनाला विलंब लागला आहे. 'मान्सूनचं आगमन यंदा दक्षिणेपासून उत्तर भारतापर्यंत पाच-सात दिवसांच्या विलंबाने होईल. जूनमध्ये देशभरात पाऊस सरासरीपेक्षा कमी होणार आहे,' अशी माहिती भारतीय हवामान विभागप्रमुख डी. शिवानंद पै यांनी दिली.