भारताविरुद्धच्या सामन्यात पाकिस्तानी खेळाडूंनी शांततेनं खेळावं

    दिनांक :07-Jun-2019
लंडन
'आयसीसी विश्वचषक स्पर्धेत भारताविरुद्ध खेळताना पाकिस्तान क्रिकेट संघाने केवळ खेळावरच लक्ष केंद्रित करावे', अशा सूचना पाकिस्तानचे पंतप्रधान इम्रान खान यांनी पाकिस्तानी क्रिकेट संघाला दिल्या आहेत. येत्या १६ जून या दिवशी भारत विरुद्ध पाकिस्तान हा वर्ल्डकपमधील बहुप्रतीक्षित सामना होत आहे. या सामन्यापूर्वी इम्रान खान यांनी ही सूचना केली आहे. पाकिस्तानी खेळाडूंनी 'जशास तसे' हा दृष्टीकोन न ठेवता फक्त आपल्या खेळावर लक्ष केंद्रित करावे, असे इम्रान यांनी पाक संघाला सांगितले आहे. भारताचे गडी बाद झाल्यानंतर वेगळ्या प्रकारचा आनंद व्यक्त करण्याची परवानगी मागणारा प्रस्ताव पाक संघाने इम्रान खान यांना पाठवला होता. ही माहिती पाकिस्तान सरकारच्या एका वरिष्ठ अधिकाऱ्याने 'मुंबई मिरर'शी बोलताना दिली होती.
मार्च महिन्यात भारतीय क्रिकेट संघाने रांची येथे ऑस्ट्रेलियाविरुद्धच्या सामन्यात पुलवामा शहिदांच्या स्मृतिप्रित्यर्थ लष्करी कॅप परिधान केली होती. भारत खेळाला वेगळाच रंग देत आहे असे म्हणत पाकिस्तानने त्यावेळी भारतीय संघाला विरोध दर्शवला होता. यालाच कृतीतून उत्तर देण्याचा पाक संघाचा इरादा होता. मात्र, स्वत: एक खेळाडू म्हणून कारकिर्द गाजवलेले इम्रान खान यांनी पाक संघाला अशा प्रकारचे कोणतेही पाऊल उचलण्याची मनाई केली आहे.
 
 
खरे तर असे कोणतेही बदल करण्यासाठी आंतरराष्ट्रीय क्रिकेट परिषदेकडे (आयसीसी) परवानगी मागावी लागते. यासाठी काही नियमही निश्चित करण्यात आले आहेत. पाकिस्तानने मात्र अशी कोणतीही परवानही मागितली नसल्याचे आयसीसीच्या अधिकाऱ्यांनी सांगितले. टीम इडियाने मार्च महिन्यात परिधान केलेल्या आर्मी कॅपसाठी बीसीसीआयने आयसीसीकडे परवानगी मागितली होती. तसेच, आयसीसी वर्ल्ड कपमधील दक्षिण आफ्रिकेविरुद्धच्या भारताच्या पहिल्याच सामन्यात महेंद्रसिंग धोनीने घातलेल्या ग्लोव्हजवर अर्धसैनिक दलाचा लोगो होता. आयसीसीने तो हटवण्याचे आवाहन केले आहे.
शतक झाल्यानंतर साजरा करा आनंद
उत्साहाच्या भरात पाकिस्तानी संघाने असे काहीही करू नये असा सल्ला पाकिस्तान क्रिकेट बोर्डाचे चेअरमन एहसान नमी यांनी दिला आहे. दुसऱ्या संघाने काही केले म्हणून तसे आपणही करावे हे चुकीचे आहे, असे नमी यांनी म्हटले आहे. मात्र, संघातील खेळाडूने शकत ठोकल्यानंतर वेगळ्या प्रकारे आनंद व्यक्त करता येईल, असे ते म्हणाले. सन २०१६ मध्ये मिसबाह उलहक याने लॉर्ड्सवर कसोटी सामन्यात शतक ठोकल्यानंतर पुशअप्स केले होते याची आठवण नमी यांनी करून दिली. त्यावेळी उलहक याने लष्कराप्रती सन्मान व्यक्त करण्याच्या उद्देशाने तसे केले होते.
भारत-पाक सामन्याकडे सर्वांचेच लक्ष
फेब्रुवारी महिन्यात पुलवामा हल्ला झाल्यानंतर होत असलेला भारत-पाकदरम्यानचा हा पहिलाच सामना आहे. या सामन्याबाबत क्रिकेटप्रेमींना उत्सुकता आहे. भारताने वर्ल्डकपमध्ये पाकिस्तान संघावर बहिष्कार टाकावा, अशी मागणीही करण्यात आली होती. मात्र, ही मागणी मान्य करण्यात आली नाही.