उद्धव ठाकरे १६ जूनला अयोध्येला जाणार

    दिनांक :07-Jun-2019
'पहले मंदिर, फिर सरकार...' अशी घोषणा देत मागील वर्षी संपूर्ण देशाचं लक्ष वेधून घेणारी शिवसेना पुन्हा एकदा अयोध्यावारीसाठी सज्ज झाली आहे. शिवसेनेचे पक्षप्रमुख उद्धव ठाकरे यांच्या नेतृत्वाखालील या दौऱ्याची तारीख ठरली आहे. त्यानुसार, येत्या १६ जूनला विजयी खासदारांसह उद्धव ठाकरे अयोध्येत दाखल होणार आहेत.

 
 
शिवसेना नेते, खासदार संजय राऊत यांनी ट्विटच्या माध्यमातून ही माहिती दिली आहे. नरेंद्र मोदी यांच्या पहिल्या कार्यकाळात मतभेद तीव्र झाल्यानं शिवसेनेनं राम मंदिराच्या मुद्द्यावरून भाजपला कोंडीत पकडण्याचा प्रयत्न केला होता. त्यासाठी उद्धव यांनी प्रथमच अयोध्या दौरा केला होता. 'पहले मंदिर फिर सरकार' ही शिवसेनेची घोषणा त्यावेळी देशभर गाजली. मात्र, मंदिराआधीच केंद्रात सरकार बनले आणि शिवसेना १८ खासदारांसह त्यात सहभागी देखील झाली. नव्या सरकारमध्ये पुन्हा एकदा शिवसेनेच्या वाट्याला दुय्यम खाते आले आहे.
 
 
शिवाय, येत्या विधानसभा निवडणुकीत भाजपने जागांचे समान वाटप करण्याचा निर्णय घेतला आहे. तसंच, मित्रपक्षांना १८ जागा सोडण्याचं ठरवून भाजपने आपल्या वाट्याला कमी जागा येणार नाहीत, याची काळजी घेतली आहे. विधानसभा निवडणुकीनंतर शिवसेना आणि भाजपला मुख्यमंत्रीपदासाठी जागा कमी पडल्यास मित्रपक्षांची भूमिका निर्णायक ठरणार असून मित्रपक्षांचा कौल भाजपच्या बाजूनेच राहणार असल्याने शिवसेनेची कोंडी होण्याची शक्यता आहे. त्यामुळे शिवसेनेसमोर धर्मसंकट उभं राहिल्यानेच उद्धव यांनी पुन्हा एकदा राम मंदिराचा मुद्दा पुढे करून भाजपची कोंडी करण्याचा प्रयत्न सुरू केल्याचं सांगण्यात येतं. त्याचाच एक भाग म्हणून उद्धव यांचा हा अयोध्या दौरा असल्याचंही राजकीय निरीक्षकांचं म्हणणं आहे.