हा पठ्ठा सर्वच विषयात ३५ गुण घेऊन झाला पास

    दिनांक :09-Jun-2019
 
उस्मानाबाद : नुकताच दहावीचा निकाल लागला. सर्वच गुणवंतांचे गोड कौतुक होतांना जिकडे तिकडे पाहायला मिळत आहे. एकीकडे दहावीत राज्यातील १०० पैकी १०० टक्के घेणाऱ्या २० विद्यार्थ्यांपैकी २ विद्यार्थी उस्मानाबाद जिल्ह्यातील असतांना याच जिल्ह्यातील अपसिंगा या गावच्या विद्यार्थ्याने सर्वच विषयात ३५ गुण घेऊन पास होण्याचा पराक्रम केला आहे. रोहित रोहिदास सोनवणे असे या विद्यार्थ्याचे नाव आहे़. त्याने तुळजापूर तालुक्यातील आपसिंगा येथील नरेंद्र आर्य विद्यालयातून दहावीची परिक्षा दिली होती.
 

 
 
शनिवारी दहावीचा निकाल जाहीर झाला. या निकालात रोहितला मराठी, हिंदी, इंग्रजी, गणित, विज्ञान आणि सामाजिकशास्त्र अशा सर्वच विषयात प्रत्येकी ३५ गुण मिळाले आहेत. त्याचा निकाल राज्यभरात सोशल मीडियावर फिरत असून जिल्ह्यातही त्याचीच चर्चा सुरू आहे. गावातील मुलाने अशी आगळी वेगळी कामगिरी केल्याने गावातील लोकांनी त्याचा सत्कारदेखील केला आहे. तुळजापूर तालुक्यातील कांद्याचे कोठार म्हणून ओळखल्या जाणा-या आपसिंगा गावातील रोहितचे वडील रोहिदास सोनवणे हे व त्यांच्या पत्नी शेती करून कुटुंबाची उपजीविका भागवितात. रोहितचा एक भाऊ आठवीत तर बहीण सहावीचे शिक्षण घेत आहे़ रोहितचे आई-वडील हे दहावीपर्यंतही शिक्षण घेऊ शकले नाही़ त्यामुळे मुलांच्या शिक्षणाप्रती ते जागरुक आहेत. असे असले तरी घरची परिस्थिती प्रतिकूल असल्याने व भावंडातील सर्वात मोठा असल्याने रोहित हा आई-वडिलांना शेती कामात मदत करायचा.