फायटर जेट हटवा, तरच भारतासाठी हवाई क्षेत्र खुलं करू: पाक

    दिनांक :12-Jul-2019
इस्लामाबाद,
बालाकोट हवाई हल्ल्यांनंतर पाकिस्तानने आपलं हवाई क्षेत्र बंद ठेवलं आहे. हे हवाई क्षेत्र खुलं करण्यासाठी आता पाकिस्तानकडून अट ठेवण्यात आली आहे. जोपर्यंत भारतीय वायुसेनेच्या हवाई तळांवरून (फॉरवर्ड बेस) लढाऊ विमानांना हटवले जात नाही तोपर्यंत भारताच्या व्यापारी उड्डाणांसाठी पाकिस्तान आपलं हवाई क्षेत्र खुलं करून देणार नाही. पाकिस्तानचे हवाई उड्डाण खात्याचे सचिव शाहरुख नुसरत यांनी एका संसदीय समितीला ही माहिती दिली.
 
 
पुलवामातील दहशतवादी हल्ल्यानंतर बालाकोटमध्ये जैश-ए-मोहम्मदच्या दहशतवादी तळांवर भारतीय वायुसेनेने केलेल्या हल्ल्यानंतर २६ फेब्रुवारीपासून पाकिस्तानने आपले हवाई क्षेत्र पूर्णपणे बंद केले. 'डॉन न्यूज'ने दिलेल्या वृत्तानुसार गुरुवारी नुसरत यांच्या विभागाने भारतीय अधिकाऱ्यांना सूचना दिली की जोपर्यमत भारताच्या हवाई तळांवरून फायटर विमाने मागे हटत नाहीत, तोपर्यंत पाकिस्तानचं हवाई क्षेत्र भारतासाठी खुलं होणार नाही.
नुसरत यांनी समितीला सांगितलं की 'भारत सरकारने आमच्याशी संपर्क साधत हवाई क्षेत्र खुलं करण्याची विनंती केली. त्यांना आम्ही आपली अट सांगितली.' दरम्यान, पाकिस्तानच्या हवाई हद्दीतून जाण्यास मज्जाव असताना भारताची सर्व प्रवासी विमाने अन्य मार्गांनी ये-जा करत आहेत.