'सत्ते पे सत्ता'च्या रिमेकला हृतिकचा नकार

    दिनांक :22-Jul-2019
मुंबई,
'सुपर ३०' च्या यशानंतर हृतिक रोशन अमिताभ बच्चनच्या 'सत्ते पे सत्ता' या सुपरहिट सिनेमाच्या रिमेकमध्ये प्रमुख भूमिकेत दिसणार असल्याची सिनेवर्तुळात चर्चा होती. या चर्चेला खुद्द हृतिकनेच पूर्णविराम दिला आहे. सत्ते पे सत्ताच्या रिमेकमध्ये आपण काम करणार नसल्याचं त्याने सांगितलं आहे. आता कोणत्या सिनेमात काम करणार हे लवकरच जाहीर करू असंही हृतिकने यावेळी सांगितलं आहे.
 
 
सत्यघटनेवर आधारित असलेल्या हृतिकच्या 'सुपर ३०' या सिनेमाने बॉक्स ऑफिसवर चांगली कमाई केली आहे. हृतिकच्या भूमिकेचे कौतुक केलं जातं असून समीक्षकांनीही या सिनेमाला चांगले गुण दिले आहेत. प्रदीर्घ काळानंतर हृतिकने 'सुपर ३०'च्या माध्यमातून बॉलिवूडमधील स्पर्धेत कमबॅक केलं आहे. म्हणूनच सुपर ३० नंतर हृतिक कोणत्या सिनेमात काम करणार याबद्दल सगळ्यांना उत्सुकता लागली आहे. त्यातच सत्ते पे सत्ता च्या रिमेकमध्ये हृतिक आणि कतरिना प्रमुख भूमिका वठवणार असल्याची चर्चा सिनेवर्तुळात रंगू लागली होती. याबद्दल डीएनए वृत्तपत्राला दिलेल्या मुलाखतीत हृतिकने खुलासा केला आहे. 'सत्ते पे सत्ताच्या रिमेकमध्ये मी काम करणार नाही. पण अमिताभ बच्चन यांनी साकारलेली भूमिका वठवण्याची संधी मिळाल्यास निश्चित आवडेल. माझ्या पुढच्या सिनेमाचं नाव मी लवकरच जाहीर करीन' असं हृतिकने सांगितलं आहे.
हृतिकचा 'सुपर ३०' हा सिनेमा राजस्थान आणि उत्तर प्रदेश या राज्यांमध्ये टॅक्स फ्री झाला आहे. त्याच्यासोबत मृणाल ठाकुर, अमित साधू, पंकज त्रिपाठी, आदित्य श्रीवास्तव आणि नंदीश संधू या चित्रपटात प्रमुख भूमिकेत आहेत.