पर्ण पेठे दिसणार 'या' नव्या भूमिकेत

    दिनांक :04-Jul-2019
अभिनेत्री पर्ण पेठे नव्या चित्रपटात केव्हा दिसणार, अशी चाहत्यांकडून सातत्याने विचारणा होत होती. मात्र, ती लवकरच एका वेगळ्या भूमिकेत दिसणार आहे. पर्ण एका रिॲलिटी शोची सूत्रसंचालिका म्हणून समोर येतेय. या निमित्तानं तिचं छोट्या पडद्यावर पदार्पण होत आहे. या कार्यक्रमानिमित्त बऱ्याच वर्षांची इच्छा पूर्ण होत असल्याचं तिनं सांगितलं.
 
 
पर्ण म्हणाली, ‘कॉमेडी हा माझा प्रांत नाही. मात्र या निमित्तानं खूप गोष्टी शिकायला मिळणार आहेत. या कार्यक्रमासाठी असणापे परीक्षक हे विनोदाचे बादशहा आहेत. त्यांच्यासोबत स्टेज शेअर करणं ही मोठी जबाबदारी आहे. स्पर्धकांची ऊर्जाही भन्नाट आहे. ते ज्या मेहनतीनं परफॉर्मन्सची तयारी करतात ते कौतुकास्पद आहे. 
 
कुठच्याही कार्यक्रमाचा सूत्रसंचालक हा स्पर्धक आणि प्रेक्षकांमधला दुवा असतो असं मला वाटतं. त्यामुळे बोलीभाषेत संवाद साधण्याचा मी प्रयत्न करते. आजची पिढी ज्या भाषेत एकमेकांशी बोलते तसाच हा संवाद असेल. या कार्यक्रमासाठी मला छान ग्लॅमरस लूक मिळाला आहे. त्यामुळे प्रत्येक भागात मला चाहत्यांसमोर वेगळ्या अंदाजात यायला मिळणार याचा आनंद आहे.’