डॉइश बँकेच्या १८ हजार कर्मचाऱ्यांच्या नोकऱ्यांवर गदा

    दिनांक :09-Jul-2019
डॉइश (Deutsche) बँक या जगभरात जाळे असलेल्या बँकेचे कर्मचारी सध्या घबराटीच्या वातावरणात आहेत. सोमवारी बँकेच्या अनेक कर्मचाऱ्यांचा नोकरीचा शेवटचा दिवस होता. जर्मनीच्या या बँकेने कंपनीच्या पुनर्रचनेची घोषणा केली आणि काही तासांतच कंपनीच्या एचआरने कर्मचाऱ्यांना कामावरून कमी करत असल्याची पत्रे पाठवली. डॉइश बँकेच्या एकूण १८ हजार कर्मचाऱ्यांच्या नोकऱ्यांवर टप्प्याटप्प्याने गदा येणार आहे.
 
 
बँक आपल्या ट्रेंडिंग उद्योगाचा मोठा भाग बंद करणार आहे. रविवारी कंपनीने तशी घोषणा केली. त्यानुसार, सिडनी आणि हाँगकाँगमधील कंपनीच्या इक्विटी डिव्हिजनमध्ये काम करणाऱ्या कर्मचाऱ्यांना सर्वात आधी निरोप दिला जाणार आहे. अनेक कर्मचाऱ्यांना तशी पत्रेही मिळू लागली आहेत. हाँगकाँगसारखीच परिस्थिती नंतर लंडन आणि न्यूयॉर्कमधील बँकेच्या कार्यालयांमध्ये दिसली.
बेंगळुरूमधील डॉइश बँकेच्या एका कर्मचाऱ्याने सांगितले की, त्याला आणि त्याच्या अनेक सहकाऱ्यांना सांगितलंय की त्याची नोकरी जाणार आहे. एका महिन्याच्या पगारासह एक रिलिव्ह लेटर दिलं जातं. कर्मचाऱ्यांमध्ये यामुळे तणावाचं आणि निराशेचं वातावरण आहे.