मुंबईत पुन्हा मुसळधार पावसाचा इशारा

    दिनांक :09-Jul-2019
मुंबई,
गेल्या आठवड्यात मुंबई आणि उपनगरांना झोडपून काढणाऱ्या पावसानं या आठवड्यातही तुफान फटकेबाजी सुरू केली आहे. आज मंगळवारी सकाळी सुरुवातीच्या तीन तासांत सांताक्रूझमध्ये १०८.२ मिमी पावसाची नोंद झाली आहे. पुढील २४ तासांत मुंबई, उपनगरे आणि परिसरात मुसळधार पाऊस कोसळण्याची शक्यता हवामान विभागानं व्यक्त केली आहे. त्या पार्श्वभूमीवर मुंबईकरांनी सतर्क राहावं, असं आवाहन महापालिका प्रशासन आणि मुंबई पोलिसांनी केलंय.

गेल्या आठवड्यात मुंबई, उपनगरे आणि परिसरातील जिल्ह्यांत मुसळधार पाऊस कोसळला. मुंबईत तर पावसानं दाणादाण उडाली. अनेक ठिकाणी पाणी साचलं होतं. रस्ते, रेल्वे वाहतूक विस्कळीत झाली होती. काही ठिकाणी घरांमध्ये पाणी शिरलं होतं. पावसामुळं मुंबईत जीवित आणि वित्तहानीही झाली होती. त्या पार्श्वभूमीवर मुसळधार पावसामुळं निर्माण होणाऱ्या परिस्थितीचा सामना करण्यासाठी महापालिका प्रशासन आणि राज्य सरकारनं कंबर कसली आहे. लोकांनी सतर्क राहावं, असं आवाहन मुंबई पोलीस आयुक्त संजय बर्वे यांनी केलं.
हवामान विभागाच्या अंदाजानुसार, मुंबई, उपनगरे आणि परिसरात मुसळधार पाऊस कोसळण्याची शक्यता आहे. स्कायमेटच्या अंदाजानुसार, मुंबई, उपनगरे, पालघर, ठाणे, पुणे, रायगड, रत्नागिरीत मंगळवारी हलक्या आणि मध्यम स्वरूपाचा पाऊस पडण्याची शक्यता आहे. मुंबईत काही ठिकाणी मुसळधार पावसाची शक्यताही व्यक्त करण्यात आली आहे.
८ दिवसांत जुलैच्या सरासरीच्या ८४ टक्के पाऊस
मुंबईमध्ये सोमवारी रात्रीपर्यंत जुलैच्या सरासरीच्या ८४ टक्के पाऊस पडला आहे. जुलैमध्ये सरासरी ८४० मिमी पाऊस पडतो. पण सोमवार रात्रीपर्यंतच ७०.८७ मिमी पाऊस बरसला आहे. ठाणे शहरात सोमवारी दिवसभर ५२ मिमी पावसाची नोंद झाली. मुंबईकरांसाठी समाधानाची बाब म्हणजे मुंबईला पाणीपुरवठा करणाऱ्या तलावांमधील साठा वाढला आहे.