उपराजधानीत एकाच रात्रीत तीन हत्या

    दिनांक :22-Aug-2019
नागपूर, 
शहरात एकाच रात्री वेगवेगळ्या भागात तीन हत्या झाल्याने एकाच खळबळ उडाली आहे. यातील एक घटना ही संध्याकाळी वर्दळीच्या रस्त्यावर झाली तर अन्य एका घटनेत एका व्यावसायिकाला रस्त्यात अडवून त्याच्या कारमधून बाहेर काढून त्याची हत्या करण्यात आली. तसेच तिसऱ्या घटनेत एका मजुराची हत्या करून त्याचा मृतदेह मोकळ्या जागेत फेकून देण्यात आल्याचे समोर आले आहे. या घटनेमुळे कायदा व सुव्यवस्थेवर प्रश्नचिन्ह निर्माण झाले आहे. 
 
 
 
यातील पहिली घटना बुधवारी रात्री साडे सातच्या दरम्यान नंदनवन पोलीस स्टेशनअंतर्गत येणाऱ्या हसनबाग रोडवर घडली. हा रस्ता वर्दळीचा असून येथे विविध दुकाने तसेच ठेले आहेत. या प्रकरणातील फिर्यादी मोहम्मद आसिफ शेख यांचाही येथे भाजीचा व्यवसाय आहे. या प्रकरणातील आरोपी अतुल शेंडे (४५) आणि अक्षय करोते (२६) हे शेख यांच्या ठेल्यावर मद्यधुंद अवस्थेत आले. या दोघांनी शेख यांच्या ठेल्यावरुन भाजी खरेदी केली. आले, मिरची आणि कोथिंबीर अशा तीन वस्तू शेख यांच्या ठेल्यावरून घेतल्या आणि गाडीच्या डिक्कीत टाकून हे दोघेही तेथून निघत होते. यावेळी शेख यांनी त्यांना हटकले आणि भाजीचे पैसे मागितले. मात्र अतुल आणि अक्षय यांनी हुज्जत घालण्यास सुरूवात केली. यानंतर दोघांनी शेख यांना मारहाण सुरू केली. या दोघांनी शेख यांच्या मांडीत चाकू मारला. हा प्रकार शेखचा मित्र सय्यद इमरान सय्यद नियाद (२२) याने‌ बघितला. इमरान हा शेख यांच्या मदतीला धावला. दोन्ही आरोपींनी इमरानलाही मारहाण सुरू केली आणि त्याच्या चाकू त्याच्या छातीत भोसकला. त्यांनी इमरानच्या छातीवर चाकुने सपासप वार केले. इमरान रक्ताच्या थारोळ्यात रस्त्यावर कोसळला. इमरानचा जागीच मृत्यू झाला. तसेच शेख गंभीररित्या जखमी झाले. यानंतर अतुल आणि अक्षय यांनी शेख यांच्या गल्ल्यातील १ हजार रुपये लुटले आणि तेथून फरार झाले. नंदनवन पोलिसांनी काही तासांच्या आतच अतुल आणि अक्षय यांना अटक केली. पोलिसांनी या प्रकरणी भादंविच्या ३०२, ३२६ आणि विविध कलमांन्वये गुन्हे दाखल केले आहेत.
दुसरी घटना नंदनवन पोलिस ठाण्याच्या हद्दीतील घडली आहे. एका तरुणाची हत्या करून त्याचा मृतदेह एका मोकळ्या जागेत फेकून देण्यात आला. ही  मुंगसाजीनगर परिसरात ही घटना समोर आली. विक्की विजय डहाके असे या प्रकरणातील मृतकाचे नाव आहे. तो हातमजुरी करीत असे. त्याला दारुचे व्यसन होते. एका प्राणघातक हल्ल्या प्रकरणी त्यावर गुन्हाही दाखल करण्यात आला होता. त्याच्यावर तिक्ष्ण शस्त्रांनी हल्ला चढवून त्याची हत्या करून त्याचा मृतदेह मोकळ्या जागेत फेकून देण्यात आला. या प्रकरणातील आरोपी अनोळखी असून पोलिस कसून तपास करीत आहेत. या प्रकरणी पोलिसांनी खुनाचा गुन्हा दाखल केला आहे.
 
तिसऱ्या प्रकरणात शहरातील प्रसिद्ध व्यावसायिक ऋषी खोसला यांची बुधवारी मध्यरात्रीच्या सुमारास हत्या करण्यात आली. ही घटना सदर पोलिस ठाण्याच्या हद्दीतील गोंडवाना चौक ते नेल्सन चौक रस्त्यावरील सदोदय लक्ष्मी अपार्टमेंन्ट समोर घडली. ऋषी हे त्यांच्या गाडीने या रस्त्यावरून जात असताना काही जणांनी त्याला अडविले आणि त्यांना कारमधून बाहेर काढून तिक्ष्ण शस्त्रांनी त्याच्या गळ्यावर वार केले. या हल्ल्यात ऋषीचा जागीच मृत्यू झाला. या प्रकरणी पोलिसांनी युथ फोर्स या संघटनेचे प्रमुख मिकी बक्षी याला अटक केली आहे. मिकी बक्षी याला यापूर्वीसुद्धा एका प्रकरणी अटक करण्यात आली होती. पुढे न्यायालयाने त्याची निर्दोष मुक्तता केली. अनैतिन संबंधातून हा खून घडल्याची प्राथमिक माहिती समोर आली आहे.