खरी मैत्री

    दिनांक :04-Aug-2019
समिधा पाठक
 
मैत्री म्हणजे दोन अनोळखी मनातून निर्माण झालेले सूर! आणि खरा मित्र म्हणजे अनोळखी सुरातून निर्माण झालेल एक सुमधुर गीत. मैत्रीचा वृक्ष बहरतो तो विश्वासाच्या मुळांवर. मैत्री म्हणजे अखंड विश्वाची अनुभूती, मैत्री म्हणजे शब्दांत बंदिस्त न करता येणारी व्याख्या, मैत्री म्हणजे आयुष्याच्या पाटीवर गिरवलेला एक सुंदर धडा. शब्दांच्या चौकटी पलीकडील नातं म्हणजे मैत्री. मैत्री म्हणजे प्रेम, जिव्हाळा आणि आपुलकी. मैत्री म्हणजे एकत्र आलेल्या नितळ मनाचं एक छोटंसं गाव असतं! मित्र बनविणे फार सोपं आहे, पण मैत्री निभावण्यात खरी कला आहे. विशाल हृदय आणि संवेदनशील मनाच्या भांडवलावर मैत्री करता येते. रक्ताच्या नात्याजवळ जितकं मोकळं होता येतं नाही, तितकं मित्राकडे मनमोकळे पणान बोलता येतं. एकमेकांना साथ देणं, मित्राला समजून घेणं, वेळप्रसंगी उपयोगी पडणं या गोष्टी मैत्रीत पुरेशा असतात. एखाद्याच्या हृदयात पोहोचण्याचा सरळ आणि सोपा मार्ग म्हणजे मैत्री होय. 

 
 
आपल्या सुख-दु:खात जे सामील होतात, आपल्याला नखशिखांत जाणूनसुद्धा कधीच साथ सोडत नाहीत, ते आपले खरे मित्र! मैत्री हे आपल्या हक्काचं गाव असतं जिथं केव्हाही मनाला थारा मिळतो आणि मनसोक्त व्यक्त होता येतं. मैत्रीचं अस्तित्व कळण्यासाठी ती जगावी लागते. दिलखुलास मैत्रीमुळे आपल्याला प्रोत्साहन, प्रेरणा मिळते आणि आपल्या मनाची मरगळ निघून जाऊन आपण प्रफुल्लित होतो. मित्रासाठी सर्वस्व पणाला लावण्याची तयारी दाखवणारे मित्र मिळणे ही आपली खरी संपत्ती. मैत्री केवळ आनंद आणि समाधान देणारी असते असे नव्हे तर मैत्रीतून बरंच काही शिकायला मिळतं. मैत्रीमध्ये प्रवाही रहायचं असेल तर ती व्यक्त झालीच पाहिजे. ती व्यक्त केल्याने भावनांना मूर्त स्वरुप प्राप्त होतं. मैत्रीत गरज पडली की मेणाहून मऊ अन्‌ वज्राहून कठीण बनणे आवश्यक असते.
 
तारुण्य हा आयुष्यातील सर्वात महत्त्वपूर्ण व बहरदार टप्पा असतो. आपलं व्यक्तिमत्त्व हे तारुण्यातच घडतं असतं, आणि या टप्प्यात सगळ्यात महत्त्वपूर्ण साथ असते ती मित्रांची. कारण शिक्षण किंवा नोकरीमुळे या वयात आपण घराच्या दूर असतो. मग आपल्या अडचणी, आपली मनस्थिती समजणारे मित्रच आपल्याबरोबर असतात. मित्र म्हणजे एक प्रकारची एक्सटेंडेड फॅमिलीच असते. आई वडिलांच्या आदरापायी किंवा भीतिपोटी आपण काही गोष्टी मनमोकळेपणाने त्यांच्याशी बोलू शकत नाहीत, पण मित्रांशी बोलताना कुठलंही फिल्टर लावण्याची गरज नसते. कारण त्यांनी आपल्याला जसे आहोत तसे स्वीकारले असते. तब्येत ठीक नसताना आई प्रमाणे काळजी घेतात, यश मिळालं की बाबांसारखे कौतुक करतात. कधी चुकलो तर कानउघाडणी करतील आणि वेळ पडेल तिथं आपली बाजू सावरतील. मैत्रीत कुठलाच संकोच, भीती किंवा लाज नसते, कारण मैत्री ही जजमेंटल नसून इन्ट्रूमेंटल असते. भांडणं, रुसवे फुगवे हे तर चालायचंच, कारण त्याशिवाय मैत्रीला पूर्णत्व नाही मिळत. या नात्याचं सौंदर्य म्हणजे यात कुठलाच व्यवहार नसतो, किंवा अपेक्षा नसते. असतो तो केवळ विश्वास. म्हणूनच प्रत्येक नात्याचा पाया मैत्री वर असायला हवं, म्हणजे ते नातं बहरतं. मित्रांबरोबर आयुष्यभर सहवास तर मिळू नाही शकतं पण सोबत घालवलेल्या क्षणांचा सुगंध मात्र आयुष्यभर दरवळतो.
7276583054