आरमोरीच्या कुंभार पुऱ्यात साकारणार काचमहालाची प्रतिकृती

    दिनांक :29-Sep-2019
बाल शारदा उत्सवाला 24 वर्षांची परंपरा
अर्धनारीनटेश्वराचे होणार भाविकांना भव्य दर्शन
 
दौलत धोटे
आरमोरी,
संपूर्ण विदर्भात आरमोरी शहरातील दुर्गा उत्सव प्रसिद्ध आहे. त्याचप्रमाणे शहरातील शारदा उत्सव सुद्धा प्रसिद्ध आहे. आरमोरी येथील कुंभार पुऱ्यातील शारदा उत्सवाला २४ वर्षांची वैभवशाली परंपरा लाभली आहे. येथील कुंभार पुऱ्यातील बाल शारदा उत्सव मंडळ यावर्षी काचमहल अर्थात शीषमहल हा भुलभुलय्या चा देखावा त्यासोबतच शंकराच्या अर्धनारीनटेश्वराची प्रतिकृती भाविकांना दर्शनासाठी दिसणार आहे. सदर प्रतिकृती आरमोरी येथील जिल्हा परिषद केंद्रीय शाळेच्या प्रांगणात साकारणार आहे.त्यामुळे हा देखावा भाविक भक्तांसाठी आकर्षण ठरणार आहे.
 

 
 
आरमोरी शहरातील प्रसिद्ध दुर्गा उत्सव पाहण्यासाठी विविध राज्यातून भाविक भक्त येतात. दुर्गाच्या प्रतिकृती सोबतच आपसूकच भावीकभक्त शारदोत्सवाचे विविध प्रतिकृती व देखावे सुद्धा पाहतात. आतापर्यंत आरमोरी शहरातील कुंभार पुऱ्यात साकारलेल्या इतर प्रतिकृती पेक्षा ही सर्वात मोठी काचमहालाची प्रतिकृती भाविकांना अनुभवायला मिळणार आहे. त्यामुळे भाविक भक्तांचा मोठा जनसागर उसळणार आहे. आरमोरी येथील कुंभार पुऱ्यातील काचमहल व अर्धनारीनटेश्वर देखावा ३५ फूट उंच राहणार आहे.
यापूर्वी या मंडळाने नरसिंह अवतार, कालीमाता, कृष्णलीला, ज्वालामुखी,बैतूल येथील बालाजीपुरम,समुद्रमंथन,भूत बंगला आदी प्रतिकृती साकारले आहेत. काचमहलाचा हा देखावा ३ हजार चौरस फूट मध्ये राहणार असून. भाविक भक्तांना सर्वप्रथम काचमहलाचे दर्शन होणार आहे. येणाऱ्या भाविकांना काचमहलातून जातांना जावे कुठे याचा विसर पडणार असून थोड्यावेळासाठी स्मृतिभ्रंश होणार आहे. या पुढे गेल्यानंतर त्यांना शंकर-पार्वतीच्या अर्धनारीनटेश्वर या भव्य देखाव्याचे दर्शन होणार आहे. पुढे गेल्यानंतर भाविकांना ग्रामीण स्वयंपाक घरात साक्षात शारदा माता गृहिणीचे काम करताना दर्शन होणार असून या सोबतच श्री गणेशजी बाल अवतारात दिसणार आहेत. असे मनमोहक दृश्य या वर्षी मंडळाच्या वतीने साकारण्यात येत आहे.
विशेष म्हणजे मंडळ दरवर्षी आपल्या आधुनिक व वैशिष्टय पूर्ण दृश्याच्या देखाव्याचे दर्शन भाविकांसाठी तयार करीत असतात आणि हेच विशेष आकर्षण या वर्षी पण कुंभार पुरातील बाल शारदा उत्सव मंडळाने कायम ठेवल्याने या वर्षी काचमहल भाविकांसाठी विशेष आकर्षण असणार आहे.
सदर देखावा राजू कंकटवार यांच्या संकल्पनेतून साकार होणार असून, देखावा आरमोरी येथील कला वास्तुकार इम्रान सय्यद आपल्या दहा ते बारा कारागिरांना हाताशी घेऊन अहोरात्र काम करीत आहेत. हा देखावा तयार करण्यासाठी कारागीर सुरेश दहीकार,संजय गायकवाड हे अथक परिश्रम घेत आहेत. मंडळाचे संजय लोणारे,अशोक सोरते, नवनाथ कुंभारे, सुरज लोणारे,सुरज कुंभारे, मयुर सूर्यवंशी, विपुल हर्षे, कुणाल सेलोकर, नारायण धकाते,वैभव सेलोटे,दीपक मानकर,आदि सहकार्य करीत आहेत.
आरमोरी येथील कुंभार पुऱ्याचे आकर्षण या वर्षीही कायम असून भाविकांच्या मनोरंजनासाठी मंडळ सज् झाला आहे. २९ ऑक्‍टोबरला शारदा मातेच्या प्रतिमेची घटस्थापना असून. जास्तीत जास्त भाविकांनी उपस्थित राहण्याचे आवाहन कुंभारपुऱ्यातील बाल शारदा उत्सव मंडळाच्या पदाधिकाऱ्यांनी केले आहे.