श्री नरकेसरी प्रकाशनच्या ‘मधुकर भवन’चे थाटात लोकार्पण

दिनांक :31-Aug-2023

Total Views |

नागपूर,

Shree Narkesari Prakashan : तरुण भारताचे संचालन करणार्‍या श्री नरकेसरी प्रकाशन लिमिटेडच्या हिंगणा एमआयडीसी कार्यालयात नव्याने उभारण्यात आलेल्या ‘मधुकर भवन’चे लोकार्पण रा. स्व. संघाचे सरसंघचालक डॉ. मोहनजी भागवत यांच्या शुभहस्ते आज गुरुवार, 31 ऑगस्ट रोजी थाटात करण्यात आले. याप्रसंगी रा. स्व. संघाच्या अ. भा. कार्यकारिणीचे सदस्य भय्याजी जोशी विशेषत्वाने, तसेच प्रमुख अतिथी म्हणून केंद्रीय मंत्री नितीन गडकरी, विशेष अतिथी उपमुख्यमंत्री देवेंद्र फडणवीस, (Shree Narkesari Prakashan) श्री नरकेसरी प्रकाशनचे अध्यक्ष डॉ. विलास डांगरे, कार्याध्यक्ष अनिल दांडेकर व प्रबंध संचालक धनंजय बापट उपस्थित होते. तरुण भारतच्या उभारणीत आणि प्रांरभीच्या काळात मोलाचे सहकार्य करणारे व भरीव योगदान देणारे करणारे रा. स्व. संघाचे तृतीय सरसंघचालक बाळासाहेब देवरस यांचे नाव तरुण भारतच्या वर्धापन दिनाचे औचित्य साधत या नवीन इमारतीला ‘मधुकर भवन’ म्हणून देण्यात आले आहे.

तरुण भारतच्या वर्धापन दिन विशेषांकाचे विमोचन

श्री नरकेसरी प्रकाशनच्या (Shree Narkesari Prakashan) हिंगणा एमआयडीसी परिसरातील भूखंडावर उभारण्यात आलेल्या ‘मधुकर भवन’चे लोकार्पण आणि तरुण भारतच्या आणि वर्धापन दिनाचे निमित्त साधून दरवर्षीप्रमाणे यंदाही विशेषकांचे प्रकाशन करण्यात आले. ‘अन्नपूर्णा’ नावाने काढण्यात आलेला वर्धापन दिन विशेषांक यंदा भरड धान्य या विषयावर काढण्यात आला आहे.

भरड धान्यांची उपयुक्तता, त्याचे आरोग्य विषय फायदे आणि भरड धान्यापासून तयार होणारे पदार्थ यासह उपयुक्त माहिती या विशेषकांत देण्यात आली आहे. याशिवाय पुन्हा नव्याने सुरू करण्यात येणार्‍या ‘आकांक्षा’ पुरवणीचेही प्रकाशनही सरसंघचालक डॉ. मोहनजी भागवत, केंद्रीय मंत्री नितीन गडकरी, उपमुख्यमंत्री देवेंद्र फडणवीस, श्री नरकेसरी प्रकाशन लि.चे अध्यक्ष डॉ. विलास डांगरे, कार्याध्यक्ष अनिल दांडेकर, प्रबंध संचालक धनंजय बापट, मुख्य संपादक गजानन निमदेव, पुरवणीच्या संपादिका रेवती जोशी अंधारे यांच्या हस्ते करण्यात आले. ‘अन्नपूर्णा’ विशेषांकाच्या प्रकाशनप्रसंगी प्रमुख अतिथींसह विशेषांकाचे संपादक गडचिरोलीचे जिल्हा प्रतिनिधी नंदकिशोर काथवटे उपस्थित होते. ‘अन्नपूर्णा’ विशेषांकाचे वाटप शुक्रवार, 1 सप्टेंबरच्या अंकासोबत केले जाणार असून ‘आकांक्षा’ पुरवणी दैनिक अंकासोबत नियमित दर शनिवारी दिली जाणार आहे.

या (Shree Narkesari Prakashan) कार्यक्रमात डॉ. विलास डांगरे यांच्या हस्ते सरसंघचालक डॉ. मोहनजी भागवत यांना, अनिल दांडेकर यांच्या हस्ते नितीन गडकरी यांना धनंजय बापट यांच्या देवेंद्र फडणवीस यांना सन्मानचिन्ह देऊन सन्मानित करण्यात आले. कार्यक्रमाचे प्रास्ताविक प्रबंध संचालक धनंजय बापट यांनी केले. याप्रसंगी सहायक महाव्यवस्थापक प्रसन्न देशमुख यांनी वैयक्तिक गीत सादर केले. संपूर्ण कार्यक्रमाचे संचालन उपमहाव्यवस्थापक प्रगती किडे यांनी केले.