वैद्यकीय महाविद्यालयाला मिळणार प्रशस्त इमारत

Medical College : जिल्हा व परिसरातील रुग्णांना दर्जेदार आरोग्य सुविधा मिळाव्यात, त्यांची नागपूर, मुंबई, हैद्राबाद येथे उपचार घेण्यासाठी जाण्याची पायपीट कमी व्हावी व वैद्यकीय शिक्षण घेणार्‍या विद्यार्थ्यांना जिल्ह्यातच ही सुविधा उपलब्ध व्हावी यासाठी खा. प्रफुल पटेल यांनी पुढाकार घेत गोंदिया येथे शासकीय वैद्यकीय महाविद्यालयाला मंजुरी मिळवून घेतली. या महाविद्यालयाच्या इमारतीचे भूमिपूजन 11 फेब्रुवारी रोजी देशाचे उपराष्ट्रपती जगदीप धनखड, यांच्या हस्ते होणार आहे. त्यामुळे अनेक वर्षांनंतर जिल्हावासीयांची स्वप्नपुर्ती खा. प्रफुल्ल पटेल यांच्या पुढाकाराने होत आहे.

 

 

 

गोंदिया येथे शासकीय वैद्यकीय महाविद्यालय व्हावे यासाठी खा. प्रफुल्ल पटेल यांनी सुरुवातीपासूनच केंद्र व राज्य सरकारकडे पाठपुरावा केला. त्यांच्या पाठपुराव्याला यश आले असून रविवारी शासकीय वैद्यकीय महाविद्यालयाचे इमारतीचे भूमिपूजन देशाचे उपराष्ट्रपती जगदिप धनखड यांच्या हस्ते राज्याचे राज्यपाल रमेश बैस, मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार, खा. प्रफुल पटेल, मंत्री हसन मुश्रीफ, पालकमंत्री धर्मरावबाबा आत्राम तसेच गोंदिया व भंडारा जिल्यातील मान्यवरांच्या उपस्थितीत होणार आहे. वैद्यकीय महाविद्यालयाच्या बांधकामासाठी शासनाकडून सन 2013-14 मध्ये 113 कोटी रुपये मंजूर झाले होते. त्यानंतर राज्यशासनाकडून 689 कोटी रुपयांचा निधी उपलब्ध करुन देण्यात आला आहे. शासकीय वैद्यकीय महाविद्यालयाच्या मार्गातील सर्वच अडचणी दूर झाल्या आहे. यामुळे जिल्ह्यातील रुग्णांना दर्जेदार आरोग्य सुविधा मिळण्याचा मार्ग प्रशस्त झाला आहे. यामुळे जिल्हावासीयांमध्ये आनंदाचे वातावरण असून त्यांनी खा. प्रफुल्ल पटेल यांचे आभार मानले आहे.