नोएडात महिलेने दोन मुलींसह चौथ्या मजल्यावरून मारली उडी...

Noida Crime News : नोएडातील बरौला गावात शिव मंदिराजवळ राहणाऱ्या एका महिलेने आपल्या दोन मुलींना चौथ्या मजल्यावरून फेकून दिले. यानंतर तिने स्वतःही उडी मारून आत्महत्या केली. यात एका मुलीचा जागीच मृत्यू झाला तर महिला सरिता आणि तिची एक मुलगी गंभीर जखमी झाली. या दोघांवर प्रयाग हॉस्पिटलच्या आयसीयूमध्ये उपचार सुरू होते. आता या महिलेचाही उपचारादरम्यान मृत्यू झाल्याची बातमी समोर येत आहे.

 

 

 

 

मिळालेल्या माहितीनुसार, 32 वर्षीय सरिता ही महिला बरौला गावात तीन वर्षांपासून भाड्याच्या घरात राहत होती. तिचा नवरा मनोज प्रयाग हॉस्पिटलच्या कॅन्टीनमध्ये काम करतो. सकाळी साडेनऊच्या सुमारास मनोज घरातून जेवण करून कॅन्टीनमध्ये आला. अवघ्या 10 ते 20 मिनिटांनी शेजाऱ्यांनी मनोजला फोन करून घटनेची माहिती दिली. सरिता आपल्या दोन मुलींसह घराच्या छतावरून खाली पडल्याची माहिती शेजाऱ्यांनी दिली.

 

या घटनेत सरिता आणि तिची ५ वर्षांची मुलगी कृतिका यांचा मृत्यू झाला तर ३ वर्षांच्या दिव्यावर उपचार सुरू आहेत. मनोजला आणखी एक 7 वर्षांची मुलगी आहे, जी अपघाताच्या वेळी शाळेत जात होती. महिलेला चार मुली होत्या, तिने एक मुलगी तिच्या मोठ्या बहिणीला दिली होती, असे सांगण्यात आले. मनोज कामावर निघून गेल्यावर सरिताने प्रथम तिची तीन वर्षांची मुलगी दिव्या हिला चौथ्या मजल्यावरून खाली फेकले आणि नंतर पाच वर्षांच्या कृतिका हिला खाली फेकले. त्यानंतर तिने स्वतः चौथ्या मजल्यावरून खाली उडी मारली.

आर्थिक विवंचनेतून महिलेने हे पाऊल उचलल्याचे प्राथमिक तपासात समोर आले आहे. मात्र, पोलीस या प्रकरणाचा प्रत्येक बाजूने तपास करत आहेत.