सरसकट जुनी पेंशन योजना लागू करा

Old Pension Scheme : 1 नोव्हेंबर 2005 पूर्वी नियुक्त व 1 नोव्हेंबर 2005 नंतर टप्याटप्याने 100 टक्के अनुदानावर आलेल्या राज्यभरातील शाळांमधील सर्व शिक्षक-शिक्षकेत्तर कर्मचार्‍यांना व 1 नोव्हेंबर 2005 नंतर नियुक्त राज्यातील सर्व शिक्षक-कर्मचार्‍यांना सरसकट जुनी पेन्शन योजना लागू करावी, अशी मागणी आ. सुधाकर अडबाले यांनी उपमुख्यमंत्री तथा अर्थमंत्री अजित पवार यांच्याकडे केली आहे.

 

 

 

2024 चे अर्थसंकल्पीय अधिवेशन 26 फेब्रुवारीपासून सुरू झाले. अधिवेशनाच्या पहिल्या दिवशी मंत्रालयात आ. अडबाले यांनी पवार यांची भेट घेतली. 1 नोव्हेंबर 2005 पूर्वी नियुक्त व 1 नोव्हेंबर 2005 नंतर टप्याटप्याने 100 टक्के अनुदानावर आलेल्या शाळा व तुकडीवर कार्यरत राज्यभरातील सर्व शिक्षक-शिक्षकेत्तर कर्मचार्‍यांना नवीन पेंशन योजना लागू करण्यात आली. नोव्हेंबर 2005 पूर्वी नियुक्त होऊनही राज्यातील सर्व शिक्षक-शिक्षकेत्तर कर्मचार्‍यांना जुनी पेंशन योजना लागू करण्यात आली नाही. हा कर्मचार्‍यांवर झालेला मोठा अन्याय आहे. यामुळे कर्मचार्‍यांचे भविष्य असुरक्षित झाले असून, सरकारच्या या निर्णयामुळे कर्मचार्‍यांत तीव्र नाराजी आहे. ही नाराजी ते रस्त्यावर उतरून वेळोवेळी सरकारला दाखवित आहे. मात्र, कर्मचार्‍यांच्या मागणीकडे राज्य सरकार दुर्लक्ष करीत आहे. तसेच 1 नोव्हेंबर 2005 नंतर नियुक्त राज्यातील सर्व शिक्षक व कर्मचार्‍यांना जुनी पेन्शन योजना लागू करावी व पेंशन योजनेचे संरक्षण करावे, या प्रमुख मागणीसाठी महाराष्ट्र राज्य जुनी पेन्शन संघटनेद्वारा ‘व्होट फॉर ओपीएस’ नागपूर ते मुंबई संकल्प पदयात्रा काढण्यात येत आहे. या यात्रेचा समारोप मुंबई येथील आझाद मैदानावर 28 फेब्रुवारी 2024 रोजी होणार आहे. या संकल्प यात्रेत राज्यातील मोठ्या संख्येने कर्मचारी सहभागी झाले आहेत.

 

1 नोव्हेंबर 2005 पूर्वी नियुक्त व 1 नोव्हेंबर 2005 नंतर टप्याटप्याने 100 टक्के अनुदानावर आलेल्या राज्यभरातील शाळांमधील सर्व शिक्षक-शिक्षकेत्तर कर्मचार्‍यांना व 1 नोव्हेंबर 2005 नंतर नियुक्त राज्यातील सर्व शिक्षक - कर्मचार्‍यांना सरसकट जुनी पेन्शन योजना लागू करावी, अशी मागणी त्यांनी केली. या विषयावर पवार यांनी सकारात्मक प्रतिसाद देत सविस्तर चर्चा केली. यावेळी विदर्भ माध्यमिक शिक्षक संघाचे विभागीय कार्यवाह चंद्रशेखर रहांगडाले उपस्थित होते.