उत्तम जानकर आज हाती घेणार ‘तुतारी’!

Uttam Jankar : माढा लोकसभा मतदारसंघात ज्यांच्या भूमिकेकडे सर्वांचे लक्ष असलेले माळशिरस येथील धनगर समाजाचे नेते उत्तम जानकर शुक्रवारी होणार्‍या मेळाव्यात शरद पवार गटाला साथ देण्याची घोषणा करणार असल्याची माहिती सूत्रांनी दिली. जयंत पाटील, जयसिंह मोहिते पाटील आणि शरद पवार यांच्या गटाचे उमेदवार धैर्यशील मोहिते पाटील यांच्या उपस्थितीत ते पक्षप्रवेश करणार आहेत.

 

 

 

 

उत्तम जानकर यांच्या गरुड बंगल्यावर शेकडो कार्यकर्त्यांसमोर दोन्ही मोहिते पाटील आणि उत्तम जानकर यांच्या गटातील 30 वर्षांचे वैर संपवून मनोमिलन घडवून आणण्याची किमया शरद पवार साधणार आहेत. यामुळे भाजपाच्या माढातील अडचणी वाढणार आहेत. याबाबत उत्तम जानकर उद्याच्या मेळाव्यात भूमिका जाहीर करणार असले, तरी त्यांच्या निकटवर्तीयांनी मात्र आमचे तुतारी हाती घ्यायचे ठरले असल्याचे सांगितले.

 

 

भाजपाकडून वारंवार फसवणूक होत असल्याची कार्यकर्त्यांची तीव‘ भावना होती. यानंतर उत्तम जानकर यांच्या फडणवीसांसोबत तीन बैठक झाल्या. यात जानकर यांचे समाधान झाले असले, तरी कार्यकर्ते ऐकण्याच्या मनस्थितीत नसल्याने जानकर यांनी बुधवारी पुणे येथे जाऊन धैर्यशील मोहिते पाटील यांच्यासोबत शरद पवार यांची भेट घेऊन सल्ला घेतल्याचे सांगितले होते. आपला निर्णय उद्याच्या मेळाव्यात जाहीर करणार असून, कार्यकर्त्यांना फडणवीस आणि शरद पवार यांच्याशी झालेल्या चर्चेची माहिती देऊन कार्यकर्त्यांना निर्णय काय घ्यायचा, हे विचारले जाणार असल्याचे जानकरांनी सांगितले.