पालकमंत्री संजय राठोड यांचा वाढदिवस

Guardian Minister Sanjay Rathore : राज्याचे मृद व जलसंधारण मंत्री तथा यवतमाळ, वाशीमचे पालकमंत्री संजय राठोड यांचा वाढदिवस रविवारी विविध सामाजिक उपक्रमांनी उत्साहात साजरा करण्यात आला. शिवसेना पदाधिकारी, कार्यकर्त्यांसह नागरिकांनी त्यांना शुभेच्छा देण्यासाठी सकाळपासूनच गर्दी केली. शिवसेनेने यवतमाळसह दिग्रस, दारव्हा, नेर व जिल्ह्यात सर्वत्र विविध सामाजिक उपक्रम राबविले. यवतमाळ येथील अभीष्टचिंतन सोहळ्यात महिलांना शिलाई मशीन आणि गरीब व गरजू फेरीवाल्यांना हातगाडी वाटप अशा सामाजिक उपक्रमांसह शिवसेना सदस्य नोंदणी अभियानाचा शुभारंभ करण्यात आला. संजय राठोड यांचे समर्थक गिरीश व्यास यांच्या पुढाकारातून पाच गरजूंना व्यवसायासाठी हातगाड्या देण्यात आल्या.

 

 

 

यावेळी आरती गुल्हाने, उषा अवथरे, मनोहर जांभुळकर, संगीता वासनिक आणि राजू गोलाईत यांना संजय राठोड यांच्या हस्ते हातगाडी भेट देण्यात आली. या अनोख्या भेटीने या फेरीवाल्यांच्या डोळ्यांत आनंदाश्रू तरळले. याप्रसंगी शिवसेना यवतमाळ तालुकाप्रमुख योगेश वर्मा यांच्या पुढाकारात 11 गरजवंत महिलांना शिलाई मशीनचे वाटप करण्यात आले. या महिलांना रोजगार उपलब्ध व्हावा, यासाठी शिलाई मशिन देण्यात आल्या. शिवसेना जिल्हा संपर्कप्रमुख हरिहर लिंगनवार व जिल्हाप्रमुख श्रीधर मोहोड यांच्या पुढाकारात 100 शेतकर्‍यांना फवारणी किटचे वाटप संजय राठोड यांच्या हस्ते करण्यात आले. या प्रसंगी शिवसेना सदस्य नोंदणीचा प्रारंभ करण्यात आला. यावेळी नवीन सदस्यांना संजय राठोड, युवासेना राज्य कार्यकारणी सदस्य अ‍ॅड. दामिनी राठोड, हरिहर लिंगनवार, श्रीधर मोहोड व विशाल गणात्रा यांच्या हस्ते प्रमाणपत्र देण्यात आले.