भारतीय शेअर बाजार जगाला मागे टाकणार!

Indian stock market news भारतीय शेअर बाजाराने गेल्या काही महिन्यांमध्ये उल्लेखनीय वाढ नोंदवली आहे. दिवाळीच्या पार्श्वभूमीवर निफ्टी आणि बँक निफ्टीने नवे उच्चांक गाठले आहेत. मॉर्गन स्टॅनलीचे व्यवस्थापकीय संचालक रिधम देसाई यांनी भारताच्या अर्थव्यवस्थेबाबत आणि बाजारपेठेबाबत आशावादी भूमिका मांडली आहे. त्यांचे मत आहे की भारतीय बाजार इतर देशांच्या तुलनेत अधिक सक्षम ठरेल आणि पुढील काही वर्षांत भारताचा वाटा जागतिक जीडीपीमध्ये मोठ्या प्रमाणात वाढेल.

 

 

 

रिधम देसाई यांनी सांगितले की, मध्यवर्ती बँकेचे लक्ष सध्या वाढीला चालना देण्यावर आहे. आरबीआयच्या पावलांवरून हे स्पष्ट होते की पुढील एका वर्षात १२ ते १३ टक्क्यांपर्यंत कर्जवाढ होऊ शकते. त्यांनी पुढे सांगितले की कॉर्पोरेट क्षेत्राचे निकाल १५ ते २० टक्क्यांनी वाढू शकतात, तर बँकिंग क्षेत्र बाजारातील तेजीचे नेतृत्व करू शकते. सध्या बँकांचे मूल्यांकन तुलनेने कमी असल्याने गुंतवणुकीसाठी ही उत्तम वेळ असल्याचे ते म्हणाले. त्यांच्या मते, आरबीआय पुढील काळात एक-दोन वेळा व्याजदरात कपात करू शकते, ज्यामुळे अर्थव्यवस्थेला गती मिळेल. जीएसटी दरकपातीसह ही पावले बाजारासाठी बळकटीचे संकेत आहेत. त्यांनी म्हटले की, गेल्या २५ वर्षांत एवढ्या प्रमाणात दरकपात आणि सीआरआर कपात फक्त दोनदाच झाल्या आहेत. त्यामुळे हा काळ विशेष आणि गुंतवणुकीसाठी अनुकूल आहे.

 

 

रिधम देसाई यांनी देशांतर्गत गुंतवणूकदारांबाबत बोलताना सांगितले की भारतीय गुंतवणूकदारांचा शेअर बाजाराकडे कल सातत्याने वाढत आहे. जागतिक पातळीवर एआय ट्रेडिंगची लोकप्रियता वाढली असली तरी भारतात अजूनही पारंपरिक गुंतवणुकीवर विश्वास ठेवला जातो. त्यांनी सांगितले की भारताने एआय आधारित ट्रेडिंग मॉडेल्स आणि फिनटेक क्षेत्रात अधिक लक्ष केंद्रीत करावे.  त्यांनी नमूद केले की, भारताचे एकूण कर्ज हे जीडीपीच्या ७५ टक्क्यांपर्यंत पोहोचले असले तरी, देशाची आर्थिक रचना मजबूत आहे. लार्ज कॅप आणि मिड कॅप स्टॉक्समध्ये संतुलन दिसत आहे, तर बँकिंग आणि ग्राहक क्षेत्रातील शेअर्समध्ये भविष्यात मोठी वाढ होण्याची शक्यता आहे.

 

आंतरराष्ट्रीय व्यापाराबाबत त्यांनी म्हटले की अमेरिकेच्या टॅरिफ धोरणाचा भारताच्या निर्यातीवर फारसा परिणाम झालेला नाही. उलट अनेक बहुराष्ट्रीय कंपन्या आता भारतात येत आहेत. अॅपलसारख्या कंपन्या भारतात उत्पादन वाढवत आहेत आणि त्यामुळे देशाच्या औद्योगिक क्षेत्राला बळकटी मिळत आहे. रिधम देसाई यांच्या मते, पुढील १५ ते २० वर्षांत जागतिक जीडीपी वाढीपैकी २० टक्के वाढ भारतातून येईल. भारताबद्दल आशावादी राहण्याशिवाय कोणताही पर्याय नाही,” असे ते म्हणाले. “जग आता भारताकडे दुर्लक्ष करू शकत नाही. हा देश जागतिक अर्थव्यवस्थेचा पुढील केंद्रबिंदू ठरणार आहे.