अमरावती येथे १ व २ नोव्हेंबरला पक्षीमित्र संमेलन

Bird Friends Conference : अमरावती येथे १ व २ नोव्हेंबर रोजी आयोजित महाराष्ट्र पक्षीमित्र संमेलनात सहभागी होण्याकरिता बहार नेचर फाउंडेशनचे ११ सदस्य सायकलने बुधवार ३० रोजी रवाना होणार आहेत. दरवर्षी आयोजित विदर्भस्तरीय व राज्यस्तरीय पक्षीमित्र संमेलनात पर्यावरण जनजागृती आणि शाश्वत जीवनशैलीचा संदेश देत सायकलने जाण्याची परंपरा याहीवर्षी बहारचे सदस्य कायम ठेवणार आहेत.

 

 

 

 

 

 

निसर्ग संवर्धन, जैवविविधता जनजागृती आणि पर्यावरण शिक्षण या क्षेत्रात कार्यरत असणार्‍या बहार नेचर फाउंडेशनने १० वर्षे पूर्ण केली असून अकराव्या वर्षात पदार्पण केले आहे. या निमित्ताने बहारचे ११ सायकलपटू या संमेलनात सहभागी होण्यासाठी ३० रोजी दुपारी १ वाजता स्थानिक शिवाजी चौकातून प्रस्थान करतील. बहारचे संस्थापक अध्यक्ष तथा सायकलवारीचे प्रेरणास्त्रोत प्रा. किशोर वानखडे यांच्यासह डॉ. बाबाजी घेवडे, जयंत सबाने, राजदीप राठौर, दर्शन दुधाने, अतुल शर्मा, सुषमा शर्मा, मनेशकुमार सज्जन, डॉ. लोकेश तमगिरे, अ‍ॅड. प्रसाद सोईतकर आणि हेमंत धानोरकर यांचा या सायकल यात्रेत सहभाग आहे.

 

 

बहारची ही सायकलिंग टीम पहिल्या दिवशी आर्वी येथे मुकाम करणार आहे. १ नोव्हेंबरला सकाळी ही चमू संमेलनस्थळी दाखल होईल. या प्रवासादरम्यान बहारचे सदस्य विद्यार्थी तसेच नागरिकांशी पर्यावरण संरक्षणाबाबत संवाद साधणार आहेत.

 

 

 

 

सायकल चालविल्याने केवळ कार्बन उत्सर्जन कमी होत नाही, तर आपण निसर्गाच्या अधिक जवळ जातो. या प्रवासातून आम्ही लोकांना पर्यावरणपूरक जीवनशैली स्वीकारण्यासाठी प्रेरित करू इच्छितो, अशी माहिती बहार नेचन फाउंडेशनचे अध्यक्ष डॉ. बाबाजी घेवडे यांनी दिली.