बेकायदेशीर सोनोग्राफी केंद्रांवर धडक मोहीम

illegal-sonography-center : जिल्ह्यात बेकायदेशीर सोनोग्राफी केंद्रांच्या माध्यमातून सुरू असलेल्या गर्भलिंग तपासणीच्या प्रकारांना आळा बसावा, यासाठी प्रशासनाने कडक कारवाईचे आदेश दिले आहेत. अतिरिक्‍त जिल्हाधिकारी प्रवीण महिरे यांनी संबंधित अधिकाऱ्यांना पीसीपीएनडीटी कायद्याचे उल्लंघन करणाऱ्या केंद्रांवर तत्काळ आणि कठोर कारवाई करण्याचे निर्देश दिले आहेत.

 

 

 

 

 

 

हा निर्णय जिल्हा देखरेख समितीच्या बैठकीत घेण्यात आला, ज्यामध्ये १९९४ च्या गर्भधारणेपूर्व आणि गर्भधारणेनंतरच्या निदान तंत्रज्ञान कायद्याच्या अंमलबजावणीचा आढावा घेण्यात आला. बैठकीस जिल्हा शल्यचिकित्सक व सदस्य सचिव डॉ. निवृत्ती राठोड, जिल्हा आरोग्य अधिकारी डॉ. राजकुमार गहलोत, महानगर वैद्यकीय आरोग्य अधिकारी डॉ. दीपक सेलोकर, एपीआय माधुरी गायकवाड, तसेच अन्न व औषध प्रशासनाचे अधिकारी उपस्थित होते. महिरे यांनी सांगितले की, ज्या केंद्रांवर गर्भपाताचे प्रमाण जास्त आहे, त्यावर विशेष लक्ष ठेवावे, कारण अशा ठिकाणी लिंग तपासणीचे प्रकार होण्याची शक्यता असते.

 

 

नागरिकांना आवाहन करण्यात आले आहे की, अशा बेकायदेशीर सोनोग्राफी केंद्रांची माहिती १८००-२३३-४४७५ या टोल-फ्री क्रमांकावर द्या. या बैठकीत राष्ट्रीय तंबाखू नियंत्रण कार्यक्रम, राष्ट्रीय तोंड आरोग्य कार्यक्रम आणि राष्ट्रीय फ्लोरायड नियंत्रण कार्यक्रमाचा आढावा देखील घेण्यात आला. पोलिस विभागाला सीओटीपीए कायद्यांतर्गत कारवाई करण्याचे निर्देश देण्यात आले, तर शिक्षण विभागाला तंबाखूमुक्त युवा अभियानांतर्गत जनजागृती मोहिमा राबविण्याचे आदेश दिले गेले. शाळांना ‘पिट अँड फिशर’ कार्यक्रम राबवून वैद्यकीय तपासणी शिबिरे घेण्याचे निर्देश देण्यात आले आहेत. नागरिकांच्या सहभागाशिवाय लिंगनिदानासारख्या सामाजिक विकृतींवर आळा घालता येणार नाही, असेही महिरे यांनी नमूद केले.