अरे देवा...सफारी पार्कमधून अचानक सिंह गायब!

Lion missing from safari park तामिळनाडूमधील चेन्नईजवळील वंदलूर येथील अरिग्नार अण्णा प्राणीशास्त्र उद्यानात घडलेल्या एका घटनेने प्रशासन आणि नागरिकांमध्ये मोठी खळबळ उडवली आहे. उद्यानातील सिंह सफारी विभागातून ‘शहरयार’ नावाचा सिंह अचानक बेपत्ता झाल्याने उद्यानात तणावाचे वातावरण निर्माण झाले. पाच वर्षांचा हा सिंह शुक्रवारच्या संध्याकाळी आपल्या कुंपणात परतण्याची वेळ झाली तरीही दिसला नाही, आणि त्यानंतर अधिकाऱ्यांनी तत्काळ शोधमोहीम सुरू केली.

 

 

 

 

शहरयारला काही महिन्यांपूर्वीच बेंगळुरूच्या बन्नेरघट्टा बायोलॉजिकल पार्कमधून येथे आणण्यात आले होते. सुमारे ५० एकर क्षेत्रफळ असलेल्या सिंह सफारी विभागात तो मोकळा फिरत असे. मात्र, ३ ऑक्टोबरच्या संध्याकाळी तो अचानक नजरेआड झाला. त्याच्या बेपत्ता होण्याची माहिती मिळताच, Lion missing from safari park प्राणीसंग्रहालयातील कर्मचाऱ्यांनी आणि वनविभागाने संयुक्त मोहीम राबवली. सिंहाचा शोध घेण्यासाठी रात्रीभर पाच शोधपथके कार्यरत होती. परिसरात ड्रोन आणि थर्मल इमेजिंग उपकरणांच्या मदतीने पाहणी करण्यात आली. तसेच, संभाव्य ठिकाणी दहा कॅमेरा ट्रॅप बसवण्यात आले. अखेर दुसऱ्या दिवशी शहरयार पुन्हा सफारी पार्कच्या हद्दीत दिसला, ज्यामुळे प्रशासनाला दिलासा मिळाला. रविवारी त्याच्या पावलांचे ठसेही त्या भागात आढळले, त्यामुळे तो उद्यानाच्या मर्यादेतच असल्याचे स्पष्ट झाले.

 

या संपूर्ण परिस्थितीचा आढावा घेण्यासाठी राज्याचे प्रधान मुख्य वनसंरक्षक आणि मुख्य वन्यजीव वॉर्डन राकेश कुमार डोगरा यांनी स्वतः सफारी पार्कला भेट दिली. त्यांनी अधिकाऱ्यांना सिंहाच्या प्रत्येक हालचालीवर लक्ष ठेवण्याचे, तसेच सुरक्षा उपाय अधिक काटेकोर करण्याचे निर्देश दिले. सध्या उद्यान प्रशासनाने पर्यटकांसाठी सफारी विभाग काही काळासाठी बंद ठेवण्याचा निर्णय घेतला असून, सिंह सुरक्षित असल्याचे स्पष्ट करण्यात आले आहे.