तोतया पत्रकाराने घातला महिलांना लाखोंचा गंडा

Job-Fraud : जिल्ह्यात महिलांना नोकरीचे आमिष दाखवून लाखोंची फसवणूक करणार्‍या एका पत्रकाराला नागभीड पोलिसांनी 8 ऑक्टोबरला अटक केली. राजेंद्र विनोद मेश्राम (39, रा. जामगाव बु., ता. वरोडा) असे तोतया पत्रकाराचे नाव आहे.

 

 

 

 

याबाबती तक्रार भारती फुलचंद फाले (34 वर्षे, रा. कान्पा) यांनी नागभीड पोलिस ठाण्यात दाखल केली. तक्रारीत म्हटले आहे की, आरोपी मेश्राम याने ‘स्वयंभू सनराईज ग्रामीण विकास बहुउद्देशीय संस्था, चंद्रपूर’ या संस्थेद्वारे गावागावात ‘माय इंडिया निधी बँक’च्या शाखा स्थापन केल्या असल्याचे सांगून महिलांचा विश्वास संपादन केला. भारती फाले यांना एरिया मॅनेजर पदावर नोकरी देतो तसेच इतर महिलांनाही संस्थेत नोकरी मिळवून देतो, असे सांगून त्याने बनावट ऑर्डर तयार केले. ते आर्डर खरे असल्याचे भासवून एकूण 5 लाख 30 हजार रुपयांची फसवणूक केली.

 

 

नागभीड पोलिस ठाण्यात कलम 420, 467, 468, 471 भादंवि नुसार गुन्हा नोंदविण्यात आला आहे. तपास अधिकारी सहायक पोलिस निरीक्षक दिलीप पोटभरे यांनी वरिष्ठ अधिकार्‍यांच्या मार्गदर्शनाखाली आरोपीला 8 ऑक्टोबरला अटक केली. आरोपीवर यापूर्वीही जिल्ह्यात विविध ठिकाणी अशा प्रकारचे फसवणुकीचे गुन्हे नोंद आहेत. ही कारवाई पोलिस अधीक्षक मम्मुका सुदर्शन, अपर पोलिस अधीक्षक ईश्वर कातकडे, उपविभागीय पोलिस अधिकारी राकेश जाधव व पोलिस निरीक्षक रमाकांत कोकाटे यांच्या मार्गदर्शनाखाली सहायक पोलिस निरीक्षक दिलीप पोटभरे, पोलिस हवालदार दीपक कोडापे व पोलिस अंमलदार दिलीप चौधरी यांनी केली.