बलुचिस्तान लिबरेशन आर्मीच्या हल्ल्यात सहा पाक सैनिक ठार

Balochistan Army attacks पाकिस्तानमध्ये अफगाणिस्तानसोबत युद्धबंदीची सहमती झाल्यानंतर अवघ्या काही तासांतच देशात नवे संकट उद्भवले आहे. बलुचिस्तान प्रांतातील कलाट जिल्ह्यातील मंगोचर परिसरात शनिवारी रात्री पाकिस्तानी लष्कराच्या ताफ्यावर अज्ञात हल्लेखोरांनी हल्ला केला. या हल्ल्यात दोन कमांडोसह किमान सहा सैनिक ठार झाले असून लष्कराच्या दोन वाहनांचे मोठे नुकसान झाल्याचे अधिकृत सूत्रांनी सांगितले आहे.

 

 

बलुचिस्तान लिबरेशन आर्मी (बीएलए) या दहशतवादी संघटनेने या हल्ल्याची जबाबदारी स्वीकारली आहे. मृतांमध्ये नाईक तारिक, शिपाई मुझम्मिल, शिपाई फराज, शिपाई आझम नवाज, लान्स नाईक शाहजहान आणि शिपाई अबशर यांचा समावेश असल्याची पुष्टी पाकिस्तानी लष्कराच्या सूत्रांनी केली आहे. सुरुवातीच्या माहितीनुसार, हा हल्ला अत्यंत नियोजित पद्धतीने करण्यात आला होता. हल्लेखोरांनी स्नायपर रायफल्स आणि रॉकेट-प्रोपेल्ड ग्रेनेड्सचा वापर केला. अचानक झालेल्या या हल्ल्यानंतर परिसरात सुमारे ५० मिनिटे तीव्र चकमक चालली. स्थानिक प्रशासनाने सर्व प्रवेशमार्ग आणि बाहेर पडण्याचे रस्ते बंद करून शोधमोहीम सुरू केली आहे.

बीएलएच्या दहशतवादी कारवाया अलिकडच्या काळात अधिक संघटित आणि घातक बनल्या आहेत. या संघटनेचा उद्देश बलुचिस्तानला पाकिस्तानपासून वेगळे करणे आहे. केंद्र सरकारकडून होणाऱ्या आर्थिक शोषण आणि दुर्लक्षाचा बदला म्हणून ते वारंवार लष्करी आणि सरकारी प्रतिष्ठानांना लक्ष्य करत आहेत. चीन-पाकिस्तान आर्थिक कॉरिडॉर प्रकल्पावरही बीएलएचे हल्ले वाढले आहेत. या प्रकल्पाला पाकिस्तानच्या आर्थिक भविष्यासाठी महत्त्वपूर्ण मानले जाते, मात्र या भागातील वाढत्या बंडखोरीमुळे परिस्थिती अधिक अस्थिर होत आहे. अधिकाऱ्यांच्या माहितीनुसार, हल्ल्यानंतर पाकिस्तानी सुरक्षा दलांनी कलाट परिसरात मोठ्या प्रमाणात शोधमोहीम आणि क्लिअरन्स ऑपरेशन सुरू केले आहे. हल्ल्यानंतरचा परिसर अद्याप तणावपूर्ण असून पुढील २४ तासांत आणखी कारवाई होण्याची शक्यता वर्तवली जात आहे.