श्रीनगर स्फोटाची तीव्रता कॅमेरात कैद...३०० मीटर दूर पडले शरीराचे भाग

Srinagar blast caught on camera जम्मू आणि काश्मीरमधील नौगाम पोलिस स्टेशनमध्ये शुक्रवारी रात्री ११.३० वाजताच्या सुमारास एक प्रचंड स्फोट झाला. या भीषण घटनेत एकूण ९ जणांचा दुर्दैवी मृत्यू झाला तर २७ जण गंभीर जखमी झाले आहेत. जखमींपैकी बहुतेक फॉरेन्सिक टीम, पोलिस आणि सरकारी अधिकारी होते. स्फोटाची तीव्रता इतकी होती की स्टेशन परिसरातील मानवी मृतदेह ३०० मीटर अंतरावर फेकले गेले.

 

 

 

मिळालेल्या माहितीनुसार, स्फोटामागील कारण म्हणून जप्त केलेले अमोनियम नायट्रेट मिसळलेले स्फोटके असल्याचे समोर आले आहे. जखमींपैकी किमान पाच जणांची प्रकृती गंभीर असल्यामुळे मृतांचा आकडा वाढण्याची शक्यता वर्तवली जात आहे. नौगाम पोलिस स्टेशनमधील स्फोट इतका भयंकर होता की स्टेशनच्या परिसरात काम करणारे फॉरेन्सिक अधिकारी आणि पोलिस थेट घटनास्थळी मृत्युमुखी पडले.

 

 

स्फोट त्या वेळी फॉरेन्सिक टीम आणि फरिदाबाद पोलिसांकडून जप्त केलेल्या स्फोटक पदार्थाची तपासणी करत असताना झाला. या घटनेत श्रीनगर प्रशासनाच्या एका नायब तहसीलदारासह दोन वरिष्ठ अधिकाऱ्यांचा तात्काळ मृत्यू झाला. स्फोटामुळे जवळच्या इमारतींना काही नुकसान झाले नसले तरी स्फोटाची तीव्रता भयंकर होती. जखमींना भारतीय लष्कर रुग्णालय आणि शेर-ए-काश्मीर इन्स्टिट्यूट ऑफ मेडिकल सायन्सेस (SKIMS) येथे दाखल करण्यात आले आहे. वरिष्ठ पोलिस अधिकारी नौगाम येथे पोहोचले असून परिसरात गस्त घालून सुरक्षा सुनिश्चित केली जात आहे.

 

 

 

स्फोटाच्या चौकशीसाठी सुरक्षा पथके आणि श्वान पथके तैनात करण्यात आले आहेत. विशेषतः नौगाम पोलिस स्टेशनच्या आवारात जैश-ए-मोहम्मदच्या दहशतवादी पोस्टर्स आढळल्याची माहिती मिळाली आहे. दरम्यान, हरियाणाच्या फरिदाबाद येथून अंदाजे २,९०० किलो स्फोटके जप्त केली गेली होती, ज्याचा संबंध या घटनेशी असल्याचे तपासात समोर आले आहे. ही घटना संपूर्ण देशाला हादरवणारी असून दिल्लीतील स्फोट प्रकरणाशी संबंधित व्हाईट कॉलर दहशतवादी मॉड्यूलशी याचे संबंध तपासले जात आहेत.