आता गुगलचे एआय तंत्रज्ञान देणार हवामानाचा अचूक अंदाज

Google weather forecast  गुगलने नव्या एआय तंत्रज्ञानावर आधारित 'वेदर नेक्स्ट 2' नावाचे हवामान अंदाज मॉडेल लाँच केले आहे. हे मॉडेल हवामानाचा अचूक अंदाज देण्याच्या दृष्टीने उल्लेखनीय ठरणार आहे, कारण कंपनीच्या म्हणण्यानुसार याची अचूकता 99.9 टक्के आहे. 'वेदर नेक्स्ट 2' हे पारंपरिक हवामान अंदाज मॉडेल्सपेक्षा अनेक पट वेगवान आणि अचूक आहे, तसेच या प्रणालीमुळे पाऊस, तापमान, वारा यासंदर्भातील माहिती अधिक तत्काळ मिळेल.

गुगलने सांगितले आहे की हे एआय बेस्ड मॉडेल शेतकऱ्यांसाठीही खूप उपयोगी ठरणार आहे. आता शेतकरी आणि सामान्य नागरिकांना हवामानाचा अचूक अंदाज मिळणार आहे, ज्यामुळे शेतीसाठी योग्य वेळी पाणी देणे, पीक संरक्षण आणि इतर उपाययोजना करणे शक्य होईल. पारंपरिक मॉडेल्सच्या तुलनेत, जे अंदाज तयार करण्यासाठी तास वाया घालवतात, गूगलची टीपीयू चिप आता एका मिनिटापेक्षा कमी वेळात हा अंदाज तयार करू शकते.

'वेदर नेक्स्ट 2' हे गुगलच्या प्रमुख प्लॅटफॉर्म्सवर समाविष्ट केले जाणार आहे. सर्च, मॅप्स, जेमिनी आणि पिक्सेल वेदर यामध्ये याचे इंटिग्रेशन केले जाईल. याशिवाय एंटरप्राइझ युजर्ससाठी अर्ली ऍक्सेस प्रोग्राम देखील सुरू केला जाईल, ज्याद्वारे उद्योगधंद्यांना रिअल-टाइम आणि हाय-रिझोल्यूशन हवामान अंदाजाचा फायदा मिळेल. गुगलच्या या नव्या तंत्रज्ञानामुळे हवामान अंदाज अधिक अचूक, वेगवान आणि विश्वासार्ह होणार असल्याचे कंपनीने स्पष्ट केले आहे. या सेवा सुरू झाल्यानंतर शेतकरी, उद्योगधंदे तसेच सामान्य नागरिक यांना हवामान संबंधित निर्णय घेणे अधिक सोपे होणार आहे.