दहशतवाद्यांच्या उबदार कपड्यांसाठी भीक मागत आहे जैश!

Jaish is begging भारताच्या ‘ऑपरेशन सिंदूर’नंतर पाकिस्तानमधील दहशतवादी संघटना जैश-ए-मोहम्मद पूर्णपणे कोलमडलेली दिसत आहे. भारतीय सुरक्षा दलांच्या अचूक कारवाईत पाकिस्तानातील अनेक दहशतवादी तळ उद्ध्वस्त झाले, तर १०० हून अधिक दहशतवादी ठार झाले. या कारवाईने जैशचा कणा अक्षरशः मोडला असून संघटनेची ताकद, मनोबल आणि आर्थिक सामर्थ्य तिन्ही पातळ्यांवर मोठ्या प्रमाणात घटले आहे. या परिस्थितीमुळे जैशची अंतर्गत व्यवस्था विस्कटली असून त्यांना दहशतवादी कार्य टिकवणेही कठीण झाले आहे. कारवाईनंतर संघटनेची आर्थिक परिस्थिती इतकी बिघडली आहे की जैश-ए-मोहम्मदला पीओकेमध्ये देणगी मागण्याची वेळ आली आहे. संघटनेने तातडीच्या निधी संकलनासाठी मोहीम सुरू केली असून आपल्या दहशतवाद्यांच्या मूलभूत गरजा भागवण्यासाठी त्यांनी लोकांना ‘आपत्कालीन योगदान’ देण्याची विनंती केली आहे. ही परिस्थिती जैशच्या आतापर्यंतच्या सर्वात गंभीर आर्थिक तुटवड्यांपैकी एक असल्याचे सुरक्षा तज्ज्ञांचे मत आहे.

 

पाकिस्तानमध्ये हिवाळा जवळ आल्याने जैश-ए-मोहम्मदने आपल्या दहशतवाद्यांसाठी ‘हिवाळी बचाव किट’ची मागणी केली आहे. कडक थंडीपासून वाचण्यासाठी या किटची गरज असल्याचे सांगत त्यांनी एका किटची किंमत २०,००० पाकिस्तानी रुपये इतकी जाहीर केली आहे. यात कोट, बूट, ब्लँकेट, हातमोजे आणि मोज्यांचा समावेश असल्याचे संघटनेने म्हटले आहे. अत्यंत थंड हवामानातील कामकाजासाठी आवश्यक असलेल्या अगदी प्राथमिक सुविधाही पुरवता न येणारी ही अवस्था जैशची वास्तविक स्थिती उघड करते. सुरक्षा संस्थांच्या माहितीनुसार, भारताच्या ‘ऑपरेशन सिंदूर’मुळे जैशची पुरवठा साखळी पूर्णपणे कोसळली आहे. दहशतवाद्यांना काश्मीर खोऱ्यात टिकून राहण्यासाठी आवश्यक असलेले अन्न, कपडे, औषधे, संपर्क साधने आणि शस्त्रास्त्रांचा पुरवठा मोठ्या प्रमाणात ठप्प झाला आहे. परिणामी, संघटनेचे सदस्य कठीण परिस्थितीत अडकले असून त्यांना सक्रिय राहणेही अवघड झाले आहे.

भारतीय सुरक्षा यंत्रणांचे म्हणणे आहे की जैशने हिवाळ्यातील गरजांसाठी देणगी मागण्यास सुरुवात केली आहे, ही बाब स्वतःच दाखवते की ‘ऑपरेशन सिंदूर’ने पाकिस्तानातील दहशतवादी नेटवर्कवर किती प्रभावी प्रहार केला आहे. दहशतवादी अड्डे उद्ध्वस्त, आर्थिक पुरवठा बंद, सीमा ओलांडून होणाऱ्या हालचालींवर मोठा अडथळा आणि आता थंडीपासून बचावासाठी मदत मागावी लागत असल्याने जैश-ए-मोहम्मदची ही कदाचित गेल्या दशकातील सर्वात कमकुवत अवस्था असल्याचे स्पष्ट झाले आहे.