डॉक्टरांनी टाक्यांऐवजी मुलाच्या डोळ्याजवळ लावले फेविक्विक!

doctor put Feviquick मेरठमध्ये दोन वर्षांच्या मुलावर झालेल्या वैद्यकीय निष्काळजीपणाची धक्कादायक घटना समोर आली असून, खाजगी रुग्णालयाच्या बेफिकीरीमुळे संपूर्ण आरोग्य व्यवस्थेवर प्रश्नचिन्ह उभे राहिले आहे. जागृती विहार एक्स्टेंशनमधील महापाल हाइट्स येथे राहणारे वित्त व्यावसायिक जसप्रिंदर सिंग यांचा मुलगा मनराज सिंग घरी खेळत असताना डोळ्याजवळ खोलवर जखमी झाला. घाबरलेल्या कुटुंबीयांनी तातडीने भाग्यश्री रुग्णालयात धाव घेतली. परंतु तेथे जे घडले त्याने सर्वांना हादरवून टाकले.

 

 

 

कुटुंबाच्या म्हणण्यानुसार, रुग्णालयातील डॉक्टरांनी जखम टाके घालून शिवण्यास नकार दिला. टाके घातल्यास चेहऱ्यावर खुण राहील, असा दावा करीत त्यांनी फक्त पाच रुपयांच्या फेविक्विकने कट “सील” करण्याचा सल्ला दिला. डॉक्टरांवर विश्वास ठेवून कुटुंबीयांनी फेविक्विक आणले. मात्र, डॉक्टरांनी फेविक्विक जखमेवर लावताच दोन वर्षांचा मनराज वेदनेने प्रचंड ओरडू लागला. डॉक्टरांनी ती केवळ भीतीमुळे होणारी प्रतिक्रिया असल्याचे सांगत हे दुर्लक्षित केले, परंतु कुटुंबीयांना काहीतरी बिनसल्‍याची जाणीव झाली.

रात्रभर मुलाच्या वेदना वाढत राहिल्या आणि जखमेवर लावलेला फेविक्विकचा थर कडक झाला. सकाळी मुलाला लोकप्रिया रुग्णालयात नेण्यात आले, जिथे डॉक्टर या निष्काळजी उपचाराने स्तब्ध झाले. फेविक्विकचा कठीण थर काढण्यासाठी तब्बल तीन तास लागले आणि या वेळेत मूल वेदनेने सतत तडफडत राहिले. अखेर फेविक्विक सावधपणे काढून टाकल्यानंतर डोळ्याजवळील जखमेवर योग्य उपचार करण्यात आले आणि मुलाला चार टाके घालण्यात आले. यानंतर त्याची प्रकृती सुधारू लागली.

 

 

या गंभीर निष्काळजीपणामुळे संतप्त झालेल्या जसप्रिंदर सिंग यांनी पुन्हा भाग्यश्री रुग्णालयात जाऊन डॉक्टरांकडे स्पष्टीकरण मागितले, परंतु त्यांना कोणताही प्रतिसाद मिळाला नाही. अखेरीस त्यांनी संपूर्ण प्रकरणाची माहिती मेरठच्या मुख्य वैद्यकीय अधिकाऱ्यांना दिली. त्यांच्या तक्रारीत त्यांनी स्पष्ट नमूद केले आहे की फेविक्विकमधील रसायन मुलाच्या डोळ्यात गेले असते तर त्याचे कायमस्वरूपी नुकसान होऊ शकले असते. हे केवळ वैद्यकीय निष्काळजीपण नव्हे, तर एका बालकाच्या जीवाशी केलेला गंभीर खेळ असल्याचा आरोप त्यांनी केला आहे.