पाकिस्तानात कारखान्याचे बॉयलर फुटल्याने १५ ठार

Factory boiler explodes in Pakistan पाकिस्तानच्या पंजाब प्रांतातील फैसलाबाद येथे असलेल्या ग्लू कारखान्यात शुक्रवारी भीषण स्फोट होऊन मोठी दुर्घटना घडली. कारखान्यातील बॉयलर अचानक फुटल्याने प्रचंड स्फोट झाला आणि या घटनेत किमान १५ कामगारांचा मृत्यू झाला, तर सात जण जखमी झाले आहेत. स्फोटानंतर कारखान्यात भीषण आग पसरली आणि आसपासच्या परिसरात एकच गोंधळ उडाला. अधिकाऱ्यांच्या माहितीनुसार, स्फोट इतका जोरदार होता की कारखान्याच्या इमारतीचे संपूर्ण संरचनात्मक नुकसान झाले आणि जवळची घरे देखील हादरली. प्रशासक राजा जहांगीर यांनी सांगितले की स्फोटाचे नेमके कारण अद्याप स्पष्ट झालेले नाही, मात्र प्राथमिक तपासात बॉयलरमध्ये दोष किंवा बेपर्वाईची शक्यता व्यक्त केली जात आहे.

 

 

 

 

स्थानिक पोलिस अधिकारी मोहम्मद अस्लम यांनी सांगितले की, घटना घडल्यानंतर कारखान्याचा मालक पळून गेला असून, त्याचा शोध सुरू आहे. दरम्यान, पोलिसांनी कारखाना व्यवस्थापकाला अटक केली आहे. सध्या संपूर्ण प्रकरणाची चौकशी सुरू असून, घटनास्थळी अग्निशमन दल व आपत्कालीन पथके तैनात आहेत. पंजाबच्या मुख्यमंत्री मरियम नवाज शरीफ यांनी दुर्घटनेबद्दल तीव्र दुःख व्यक्त केले आहे. त्यांनी जखमी कामगारांना सर्वोत्तम वैद्यकीय उपचार देण्याचे आदेश दिले असून, निष्काळजीपणा आढळल्यास कठोर कारवाई केली जाईल असे स्पष्ट केले आहे.

  

 

पाकिस्तानमध्ये औद्योगिक दुर्घटनांची मालिका कायम आहे. कमी सुरक्षा मानके, दोषपूर्ण यंत्रणा आणि देखभालीतील त्रुटी यामुळे अशा अपघातांची संख्या वाढत आहे. २०२४ मध्येही फैसलाबादमध्ये झालेल्या अशाच एका बॉयलर स्फोटात अनेक कामगार जखमी झाले होते. काही दिवसांपूर्वी कराचीतील फटाक्यांच्या कारखान्यात झालेल्या स्फोटातही चार जणांचा जीव गेला होता. या नवीन दुर्घटनेने पुन्हा एकदा औद्योगिक सुरक्षेबाबत गंभीर प्रश्न निर्माण केले आहेत.