रशियाचा कीववर ग्लाइड बॉम्ब हल्ला; ५ ठार, अनेक ढिगाऱ्याखाली

Russia-Ukraine War : हिवाळा जवळ येत असताना रशिया आणि युक्रेनमधील युद्ध तीव्र होत आहे. शुक्रवारी सकाळी रशियन सैन्याने दक्षिणेकडील युक्रेनियन शहर झापोरिझ्झियावर शक्तिशाली ग्लाइड बॉम्बने हल्ला केला, ज्यामध्ये किमान पाच नागरिक ठार झाले आणि एका किशोरवयीन मुलीसह दहा जण जखमी झाले, असे स्थानिक अधिकाऱ्यांनी सांगितले. झापोरिझ्झिया प्रांतीय लष्करी प्रशासनाचे प्रमुख इव्हान फेडोरोव्ह यांनी सांगितले की, रशियन हवाई दलाने शहराच्या मध्यभागी असलेल्या निवासी भागात तीन जड ग्लाइड बॉम्ब टाकले.

 

 

 

 

 

 

या स्फोटांमुळे नऊ आणि पाच मजली इमारतींचे मोठे नुकसान झाले, खिडक्या आणि दरवाजे उडाले आणि अनेक अपार्टमेंट पूर्णपणे उद्ध्वस्त झाले. हल्ल्यात स्थानिक बाजारपेठेचेही नुकसान झाले. ढिगाऱ्याखाली अडकलेल्या लोकांना वाचवण्यासाठी बचाव पथके अजूनही काम करत आहेत. मृतांचा आकडा वाढण्याची शक्यता आहे. रशिया-युक्रेन युद्ध लवकर संपवण्याच्या अमेरिकेच्या योजनेबद्दल वाढत्या चर्चेदरम्यान हा हल्ला झाला आहे. सूत्रांनी दिलेल्या माहितीनुसार, अमेरिकेचे अध्यक्ष डोनाल्ड ट्रम्प यांच्या टीमने ३० दिवसांच्या युद्धबंदी आणि शांतता चर्चेसाठी एक चौकट तयार केली आहे.

 

 

युक्रेनचे राष्ट्राध्यक्ष व्लादिमीर झेलेन्स्की यांनी शुक्रवारी सांगितले की ते लवकरच ट्रम्प यांना भेटू शकतात आणि प्रस्तावांचा काळजीपूर्वक अभ्यास करत आहेत. झापोरिझ्झियावरील हल्ल्याचा निषेध करताना झेलेन्स्की म्हणाले, "रशियाला शांतता नको आहे. जेव्हा जग युद्ध थांबवण्याबद्दल बोलत आहे, तेव्हा ते नागरिकांवर बॉम्बहल्ला करत आहे." त्यांनी आंतरराष्ट्रीय समुदायाला रशियावर कठोर निर्बंध लादण्याचे आवाहन केले. झापोरिझ्झिया हे युक्रेनमधील एक महत्त्वाचे औद्योगिक शहर आहे आणि रशियाने वारंवार त्याला लक्ष्य केले आहे. शहराजवळील युरोपातील सर्वात मोठा झापोरिझ्झिया अणुऊर्जा प्रकल्प गेल्या तीन वर्षांपासून रशियाच्या ताब्यात आहे, ज्यामुळे अणु सुरक्षेबाबत चिंता निर्माण झाली आहे. शुक्रवारी सकाळपर्यंत रशियाने हल्ल्यावर कोणतीही प्रतिक्रिया दिली नव्हती.