धर्मेंद्र यांच्या जाण्याने तुटलं ‘देओल साम्राज्याचं’ हृदय

Dharmendra's family दिग्गज अभिनेते धर्मेंद्र यांच्या निधनानंतर त्यांच्या व्यक्तिमत्त्वाची, कारकिर्दीची आणि कुटुंबियांची पुन्हा एकदा सर्वत्र चर्चा सुरू झाली आहे. ६५ वर्षांहून अधिक काळ हिंदी चित्रपटसृष्टीत अधिराज्य गाजवणाऱ्या धर्मेंद्र यांनी आपल्या प्रतिभेने आणि साधेपणाने अनेक पिढ्या मंत्रमुग्ध केल्या. त्यांच्या निधनाची बातमी समोर आल्यानंतर चाहत्यांपासून ते चित्रपटसृष्टीतील सहकाऱ्यांपर्यंत सर्वांच्या भावना दाटून आल्या. नुकतेच रिलीज झालेल्या "एकिस" या चित्रपटाच्या पोस्टरने त्यांच्या चाहत्यांना आनंद दिला होता; पण त्याचवेळी आलेल्या निधनाच्या बातमीने सर्वांना धक्का बसला. धर्मेंद्र यांचे वैयक्तिक आयुष्यही तितकेच रोचक आणि चर्चेत राहिलेले आहे. त्यांचे कुटुंब मोठे, सुबक आणि पूर्णपणे स्टार्सनी भरलेले आहे.

 

 

त्यांच्या सहा मुलांपासून ते तेरा नातवंडांपर्यंत कुटुंबातील जवळजवळ प्रत्येक सदस्याचे बॉलिवूडशी काही ना काही नाते आहे. धर्मेंद्र यांनी प्रथम प्रकाश कौरशी विवाह केला होता, तेव्हा ते फक्त १९ वर्षांचे होते. या विवाहातून त्यांना चार मुले झाली, सनी देओल, बॉबी देओल, विजेता आणि अजिता. सनी आणि बॉबी यांनी वडिलांच्या पावलावर पाऊल ठेवत चित्रपटसृष्टीत मोठे नाव कमावले, तर विजेता आणि अजिता यांनी चित्रपटांपासून स्वतःला दूर ठेवले आणि शांत, खाजगी जीवन पसंत केले. १९८० साली धर्मेंद्र यांनी प्रकाश कौर यांच्याशी घटस्फोट न घेता हेमा मालिनीशी विवाह केला. त्या काळात या लग्नाने मोठी खळबळ उडवली होती. या विवाहातून त्यांना दोन मुली झाल्या, ईशा आणि अहाना देओल. ईशानेही अभिनयक्षेत्रात पाऊल ठेवले, तर अहाना विवाहानंतर परदेशात स्थायिक झाली.

धर्मेंद्र यांच्या कुटुंबातील प्रत्येक सदस्य स्वतःच्या क्षेत्रात उत्तम काम करत आहे. मोठा मुलगा सनी देओलने पूजा देओलशी विवाह केला असून या दांपत्याला करण आणि राजवीर ही दोन मुले आहेत. करण आणि राजवीर दोघेही अभिनयक्षेत्रात पदार्पण करून आपल्या कारकिर्दीला आकार देत आहेत. बॉबी देओलने तान्या देओलशी विवाह केला असून त्यांना आर्यमन आणि धरम ही दोन मुले आहेत. प्रकाश कौर यांच्या मुलींमध्ये विजेता आणि अजिता यांनीही आपापल्या कुटुंबात स्थिरस्थावर जीवन निर्माण केले आहे. अजिता यांचे लग्न किरण चौधरी यांच्याशी झाले असून त्यांना निकिता आणि प्रियांका अशी दोन मुली आहेत. विजेता यांचे लग्न विवेक गिलशी झाले असून त्यांना प्रेरणा आणि साहिल अशी दोन मुले आहेत.

हेमा मालिनीच्या कन्या ईशा आणि अहाना यांनीही आपले आयुष्य आपल्या पद्धतीने घडवले आहे. ईशाचे पती भरत तख्तानीपासून २०२४ मध्ये विभक्त झाले असले तरी ती आपल्या दोन मुली राध्या आणि मिरायासोबत आयुष्य समतोल ठेवताना दिसते. अहानाचे लग्न वैभव वोहरा यांच्याशी झाले असून त्यांना तीन मुले आहेत. धर्मेंद्र यांच्या निधनानंतर त्यांच्या कुटुंबाचा हा विस्तृत वृक्ष पाहताना एक गोष्ट प्रकर्षाने जाणवते, त्यांचे घर हे खऱ्या अर्थाने ‘स्टार फॅमिली’ असून, प्रत्येक सदस्याने आपल्या मार्गाने आपली ओळख निर्माण केली आहे. धर्मेंद्र यांच्या जाण्याने एक युग संपले असले, तरी त्यांची परंपरा, वारसा आणि त्यांची मोठी कुटुंबीय-छाया पुढील पिढ्यांना प्रेरणा देत राहणार आहे.