एकाकीपणाचा अंत? तुषारच्या आत्महत्येमुळे पालघर हादरले

Palghar Tushar suicide पालघर जिल्ह्यातील विक्रमगड येथील आदिवासी सेवा मंडळाच्या निवासी आश्रमशाळेत पुन्हा एकदा धक्कादायक घटना घडली आहे. फक्त 14 वर्षांच्या तुषार संतोष वांगड या आठवीतील विद्यार्थ्याने आत्महत्या करून जीवन संपवल्याची माहिती समोर आली आहे. सकाळी प्रार्थनेची वेळ असताना, सुमारे 11.45 वाजता आपल्या खोलीत नायलॉनच्या दोरीने गळफास घेतल्याचे आढळताच शाळेत एकच खळबळ माजली. विद्यार्थी, शिक्षक आणि पालकांनी धावाधाव करत परिस्थिती समजून घेण्याचा प्रयत्न केला.

 

 

 

तुषारच्या आयुष्यातील संघर्षही कमी नव्हते. काही वर्षांपूर्वी वडिलांचे निधन झाले आणि त्यानंतर आईने दुसरे लग्न केले. त्यामुळे तुषारचे संपूर्ण संगोपन त्याच्या आजीकडे होते. मात्र, गेल्या वर्षी आजीच्याही निधनानंतर तुषारची सर्व जबाबदारी विक्रमगड येथील सवादा वांगड पाड्यात राहणाऱ्या मामांवर आली. बालपणापासूनच अनुभवलेला हा एकाकीपणा आणि सलग झालेली जबाबदार व्यक्तींची साथ तुटणे याचा तुषारच्या मनावर किती परिणाम झाला होता, हे स्पष्ट नाही. मानसिक तणाव, शाळेत काही त्रास किंवा इतर कोणतीही कारणे आत्महत्येमागे होती का, हे अद्याप स्पष्ट झालेले नाही. पोलिस या सर्व बाबींची कसून चौकशी करत आहेत.

पालघर जिल्ह्यातील आश्रमशाळांमध्ये विद्यार्थ्यांच्या आत्महत्यांचे प्रमाण चिंताजनकरीत्या वाढताना दिसत आहे. काही आठवड्यांपूर्वीच वाडा तालुक्यातील आंबिस्ते आश्रमशाळेत नववी आणि दहावीतील दोन विद्यार्थ्यांनी आत्महत्या केली होती. ती घटना ताजी असतानाच विक्रमगडमध्ये घडलेल्या या प्रकरणामुळे आश्रमशाळांतील विद्यार्थ्यांची सुरक्षितता, त्यांच्या मानसिक आरोग्याची काळजी आणि प्रशासनाच्या देखरेखीबाबत अनेक प्रश्न उभे राहिले आहेत. विक्रमगड पोलिसांनी तुषारच्या मृत्यूची नोंद घेतली असून तपास सुरू केला आहे. या दुर्दैवी मृत्यूने विद्यार्थी संरक्षण आणि मानसिक आरोग्याच्या प्रश्नांवर पुन्हा एकदा गंभीरपणे विचार करण्याची गरज अधोरेखित केली आहे.