खासदार, आमदाराकडून आचारसंहितेचे उल्लंघन!

violation-of-code-of-conduct : मुख्यमंत्री देवेंद्र फडणवीस, पालकमंत्री चंद्रशेखर बावनकुळे, खासदार डॉ. अनिल बोंडे यांच्या प्रयत्नातून मंजूर झालेल्या दर्यापूर पंचायत समितीच्या इमारतीचे श्रेय घेण्याचा प्रयत्न करीत खासदार बळवंत वानखडे, आमदार गजानन लवटे यांच्यासह काँग्रेस पदाधिकार्‍यांकडून आदर्श आचारसंहिता लागू झाल्यावर दर्यापूर पंचायत समितीच्या नूतन इमारतीच्या कामाचे भूमिपूजन करण्यात आल्याचा गंभीर प्रकार उघडकीस आला आहे. या संदर्भात भाजपच्या अनुसूचित जाती विभागाचे जिल्हाध्यक्ष नकुल सोनटक्के यांनी यावर तीव्र आक्षेप घेतला असून मुख्य निवडणूक आयुक्तांकडे तक्रार करीत संबंधितावर गुन्हे दाखल करण्याची मागणी केली आहे.

 

 

 

राज्यातील स्थानिक स्वराज्य संस्था निवडणुकीच्या अनुषंगाने महाराष्ट्र निवडणूक आयोगाने ४ नोव्हेंबर २०२५ रोजी दुपारी चार वाजता पत्रकार परिषद घेऊन आदर्श आचारसंहिता लागू केली. अमरावती जिल्ह्यातही नगरपरिषद, नगरपालिका क्षेत्रात आचारसंहिता लागू केल्यानंतर खासदार बळवंत वानखडे, आमदार गजानन लवटे, काँग्रेसचे तालुकाध्यक्ष सुधाकर भारसाकळे यांच्यासह काँग्रेसचे पदाधिकारी व उद्धव ठाकरे गटाचे पदाधिकारी यांनी दर्यापूर पंचायत समितीच्या नवीन इमारतीच्या कामाचे भूमिपूजन केले.

 

 

भूमिपूजनाचे बोर्ड उभारणे, शासकीय जागेचा व साधनांचा वापर करणे, लोकप्रतिनिधींची जाहीर उपस्थिती दर्शवणे ही सर्व कृती आदर्श आचारसंहिता नियम ७, १०, १६ चे उल्लंघन करणारी आहे. या संदर्भातील तक्रार भाजपच्या अनुसूचित जाती विभागाचे जिल्हाध्यक्ष नकुल सोनटक्के यांनी राज्याचे मुख्य निवडणूक आयुक्त यांच्याकडे केली आहे. सोनटक्के म्हणाले की, मुख्यमंत्री देवेंद्र फडणवीस, पालकमंत्री चंद्रशेखर बावनकुळे यांच्याकडे सतत पाठपुरावा करून खासदार डॉ. अनिल बोंडे यांनी पंचायत समितीची नूतन इमारत मंजूर करून घेतली. असे असतानाही परस्पर कामाचं श्रेय घेण्यासाठी आचारसंहिता लागल्यावर भूमिपूजन करणे हे नियमबाह्य आहे.