'मैं मेसी और फैन्स से माफी मांगती हूं!'

Mamata Banerjee's apology कोलकात्यातील साल्ट लेक स्टेडियममध्ये लिओनेल मेस्सीच्या कार्यक्रमादरम्यान झालेल्या गोंधळानंतर पश्चिम बंगालच्या मुख्यमंत्री ममता बॅनर्जी यांनी तीव्र नाराजी व्यक्त केली आहे. गैरव्यवस्थापनामुळे ही घटना घडल्याचे मान्य करत त्यांनी अर्जेंटिनाचा स्टार फुटबॉलपटू लिओनेल मेस्सी तसेच क्रीडाप्रेमी आणि चाहत्यांची जाहीर माफी मागितली आहे. ही घटना आपल्यासाठी अत्यंत दुःखद आणि धक्कादायक असल्याचे त्यांनी स्पष्ट केले. ममता बॅनर्जी यांनी सोशल मीडिया प्लॅटफॉर्म X वर लिहिले की, हजारो फुटबॉलप्रेमींप्रमाणेच त्या देखील विवेकानंद युवा भारती क्रीडांगणाकडे जात असताना स्टेडियम परिसरात गर्दी आणि व्यवस्थापन पूर्णपणे नियंत्रणाबाहेर गेल्याचे वृत्त समोर आले. या दुर्दैवी घटनेबद्दल त्यांनी मनापासून खेद व्यक्त करत मेस्सी, क्रीडाप्रेमी आणि त्याच्या चाहत्यांची माफी मागितली.

 

 

 

या प्रकरणाची गंभीर दखल घेत मुख्यमंत्र्यांनी उच्चस्तरीय चौकशी समिती स्थापन करण्याची घोषणा केली आहे. कलकत्ता उच्च न्यायालयाचे निवृत्त न्यायाधीश न्यायमूर्ती आशिम कुमार रे यांच्या अध्यक्षतेखाली ही समिती काम करणार असून, राज्याचे मुख्य सचिव तसेच गृह आणि डोंगराळ व्यवहार विभागाचे अतिरिक्त मुख्य सचिव हे समितीचे सदस्य असतील. या समितीला संपूर्ण घटनेची चौकशी करून जबाबदारी निश्चित करण्यासोबतच भविष्यात अशा घटना टाळण्यासाठी सुधारात्मक उपाय सुचवण्याचे आदेश देण्यात आले आहेत. दरम्यान, या घटनेवरून राजकीय वातावरणही तापले आहे. भाजपच्या पश्चिम बंगाल युनिटने तृणमूल काँग्रेस सरकारवर तीव्र टीका करत या गोंधळाला प्रशासनाचे अपयश ठरवले आहे. भाजपने सोशल मीडियावर स्टेडियममधील गोंधळाचे व्हिडिओ शेअर करत बंगालच्या समृद्ध फुटबॉल संस्कृतीचे नुकसान झाल्याचा आरोप केला आहे. बंगाल आणि फुटबॉल हे नेहमीच एकमेकांचे पर्यायवाचक राहिले आहेत, मात्र सध्याच्या सत्ताकाळात ही ओळख उद्ध्वस्त होत असल्याचा दावा भाजपने केला.

 

 

भाजपचे राष्ट्रीय आयटी प्रमुख अमित मालवीय यांनीही या घटनेला “मोठा अपमान” आणि “मोठा घोटाळा” असे संबोधले आहे. राजकीय लाभासाठी मेस्सीला कोलकात्यात आणण्यात आले, मात्र अत्यंत खराब व्यवस्थापनामुळे त्यांना कार्यक्रम अर्धवट सोडावा लागल्याचा आरोप त्यांनी केला. महागडी तिकिटे खरेदी केलेल्या हजारो प्रेक्षकांची फसवणूक झाल्याचा दावा करत त्यांनी संपूर्ण प्रकरणाची जबाबदारी निश्चित करण्याची आणि राज्याचे क्रीडामंत्री अरुप बिस्वास यांच्या राजीनाम्याची मागणी केली आहे. लिओनेल मेस्सीचा कोलकाता हा भारत दौऱ्यातील पहिला थांबा होता. त्यानंतर हैदराबाद, मुंबई आणि दिल्ली येथेही कार्यक्रम नियोजित होते. १३ डिसेंबर रोजी मध्यरात्रीनंतर कोलकात्यात दाखल झालेल्या मेस्सीचे स्वागत करण्यासाठी विमानतळावर मोठी गर्दी जमली होती. यापूर्वी त्यांनी लेक टाउनमधील श्रीभूमी स्पोर्टिंग क्लबमध्ये उभारण्यात आलेल्या ७० फूट उंच पुतळ्याचे व्हर्च्युअल अनावरणही केले होते. मात्र, स्टेडियममधील गोंधळ आणि सुरक्षेच्या कारणांमुळे मेस्सीला आपला कार्यक्रम अर्धवट सोडावा लागला, ज्यामुळे चाहते आणि क्रीडाविश्वात तीव्र नाराजी व्यक्त केली जात आहे.