ISIS मॉड्यूलचा धक्कादायक प्रकार उघड

Thane ISIS module देशाच्या अंतर्गत सुरक्षेसाठी गंभीर धोका ठरलेल्या ISIS या दहशतवादी संघटनेच्या नेटवर्कमधील धक्कादायक वास्तव समोर येत आहे. महाराष्ट्रातील ठाणे जिल्ह्यात सक्रिय असलेले कथित ISIS मॉड्यूल केवळ कट्टरपंथी विचारसरणी आणि दहशतवादी कारवायांपुरते मर्यादित नव्हते, तर दहशतवादी फंडिंगसाठी थेट जंगलांची लूट करत असल्याचे उघड झाले आहे. प्रवर्तन निदेशालयाच्या (ईडी) तपासात या मॉड्यूलकडून संरक्षित वनक्षेत्रातील खैरच्या झाडांची बेकायदेशीर तोड करून त्याची तस्करी केल्याचा गंभीर प्रकार उघडकीस आला आहे.

 

 

ईडीकडून करण्यात आलेल्या मनी लॉन्ड्रिंग तपासात असे निष्पन्न झाले की ठाणे जिल्ह्यातील पडघा गावातून कार्यरत असलेले हे कथित ISIS मॉड्यूल स्थानिक संरक्षित जंगलांमधून खैरची लाकडे चोरी करत होते. या लाकडांची अवैध तोड करून विविध राज्यांमध्ये तस्करी केली जात होती. या बेकायदेशीर व्यवसायातून मिळालेल्या कोट्यवधी रुपयांचा वापर दहशतवादी कट रचण्यासाठी आणि त्यांना अंमलात आणण्यासाठी केला जात असल्याचे तपासात स्पष्ट झाले आहे.

 

 

या प्रकरणाच्या Thane ISIS module अनुषंगाने ईडीने 11 डिसेंबर रोजी दिल्ली, झारखंडमधील हजारीबाग, कोलकाता आणि उत्तर प्रदेशातील प्रयागराज येथे एकाच वेळी अनेक ठिकाणी छापे टाकले. यासोबतच महाराष्ट्रातील बोरीवली आणि पडघा या जुळ्या गावांमध्येही व्यापक शोधमोहीम राबवण्यात आली. ही कारवाई राष्ट्रीय तपास संस्था (एनआयए)ने नोव्हेंबर 2023 मध्ये दाखल केलेल्या प्रकरणाशी संबंधित आहे. या प्रकरणात पडघा येथील बंदी घालण्यात आलेल्या आंतरराष्ट्रीय दहशतवादी संघटना ISIS च्या कट्टरपंथी मॉड्यूलविरोधात आणि भारतातील या संघटनेचा स्वघोषित नेता साकीब नाचन याच्याविरोधात गुन्हा दाखल करण्यात आला होता.ईडीच्या छापेमारीदरम्यान तब्बल 3 कोटी 70 लाख रुपयांची रोकड, तसेच सुमारे 6 कोटी रुपये किमतीचे सोन्याचे दागिने आणि सोने-चांदी जप्त करण्यात आले. तपासात असेही समोर आले आहे की बोरीवली-पडघा ISIS मॉड्यूलशी संबंधित अनेक जण खैरच्या झाडांची अवैध तोड करून ही लाकडे कत्था तयार करणाऱ्या कंपन्यांना पुरवत होते. खैरच्या झाडापासून तयार होणाऱ्या कत्थ्याचा वापर पान आणि आयुर्वेदिक औषधांमध्ये मोठ्या प्रमाणावर केला जातो. या मागणीचा गैरफायदा घेत हा अवैध व्यवसाय चालवला जात होता.

 

 

ईडीने संशयितांकडून Thane ISIS module खैरची लाकडे खरेदी करणाऱ्या कत्था उत्पादक कंपन्या आणि संस्थांच्या परिसरातही छापेमारी केली आहे. तपास यंत्रणांच्या मते, हे प्रकरण केवळ दहशतवादी फंडिंगपुरते मर्यादित नसून, संघटित गुन्हेगारी, पर्यावरणाची मोठ्या प्रमाणावर होणारी हानी आणि राष्ट्रीय सुरक्षेला धोका निर्माण करणारे आहे. या प्रकरणातील तपास सुरू असून, येत्या काळात आणखी धक्कादायक खुलासे होण्याची शक्यता वर्तवली जात आहे.