कोल्हापूरची सई जाधव बनली प्रादेशिक सैन्यात पहिली महिला लेफ्टनंट!

Sai Jadhav, Lieutenant महाराष्ट्रातील कोल्हापूरच्या रहिवासी सई जाधव यांनी प्रादेशिक सैन्यात पहिली महिला लेफ्टनंट बनून ऐतिहासिक कामगिरी केली आहे. डेहराडूनमधील इंडियन मिलिटरी अकादमी (आयएमए) मध्ये महिला अधिकारी कॅडेटने यशस्वीरित्या प्रशिक्षण पूर्ण केलेली ही पहिली वेळ आहे. सई जाधवने प्रादेशिक सैन्याच्या विशेष अभ्यासक्रमांतर्गत कठोर प्रशिक्षण पूर्ण केले असून आता तिला लेफ्टनंट म्हणून कमिशन मिळाले आहे. राष्ट्रीय स्तरावरील स्पर्धात्मक परीक्षा आणि एसएसबी मुलाखत यशस्वीरित्या उत्तीर्ण केल्यानंतर सईची निवड झाली. आयएमएमध्ये सहा महिन्यांचे लष्करी प्रशिक्षण तिने यशस्वीरित्या पूर्ण केले. ही पासिंग आउट परेड (पीओपी) अकादमीसाठी ऐतिहासिक क्षण ठरला. सई जाधव आयएमएमध्ये नियमित अभ्यासक्रमात नव्हे, तर टेरिटोरियल आर्मीच्या विशेष प्रशिक्षण अभ्यासक्रमांत सहभागी झाली होती. या अभ्यासक्रमात प्रवेश घेतलेल्या १६ कॅडेट्समध्ये ती एकमेव महिला होती. तिच्या पालकांनी पासिंग आउट समारंभात खांद्यावर लेफ्टनंटचा स्टार ठेवला.

 

 

 

सई जाधव लष्करी कुटुंबातील असून तिचे वडील संदीप जाधव भारतीय सैन्यात मेजर आहेत, तर आजोबांनी ब्रिटिश सैन्यात देशाची सेवा केली होती. जून २०२६ पासून महिला अधिकारी कॅडेट्स नियमितपणे आयएमएमध्ये पुरुष कॅडेट्ससोबत प्रशिक्षण घेतील आणि पासिंग आउट परेडमध्ये सहभागी होतील, अशी घोषणा करण्यात आली आहे. सईने सांगितले की, आयएमएचे प्रशिक्षण अत्यंत आव्हानात्मक होते, पण यातून ती शारीरिक आणि मानसिकदृष्ट्या अधिक मजबूत झाली. तिला फक्त एक चांगली अधिकारी बनवले नाही, तर आत्मविश्वास वाढवले. सईने शालेय आणि महाविद्यालयीन मुलींना संरक्षण दलात सामील होण्याचा संदेश दिला. तिच्या मते, ही केवळ उत्तम कारकीर्द नाही, तर देशाची सेवा करण्याचा सर्वात प्रतिष्ठित मार्ग देखील आहे.